Estudante mellór klasifikadu 755 iha Manatuto asesu bolsa méritu
MANATUTO, 05 maiu 2023 (TATOLI)—Diretór Servisu Efikasia munisípiu Manatuto, Graciano de Jesus Baptista, hateten estudante hosi ensinu báziku, ensinu sekundáriu jerál no ensinu sekundáriu tékniku vokasionál hamutuk 755 mak sira-nia naran tama iha lista hodi asesu bolsa méritu.
“Orsamentu ensinu báziku primeiru siklu nian hamutuk $157.500, ba benefisiáriu 315. Agora ba segundu siklu sesto ano iha $147.000 ba benefisiáriu 290. Ba treseiru siklu mak $49.000, ba benefísiu 65. Ida-ne’e ita ba kategória primeiru to’o treseiru klasifikasaun nian iha Manatuto,” nia hateten ba Agência Tatoli, iha nia kna’ar fatin, kinta ne’e.
Maibé, nia dehan, orsamentu alokadu ba désimu segundu ano ensinu sekundáriu jerál ho baze ezame nasionál hamutuk $15.750 ba benefisiáriu 21. No ensinu sekundáriu tékniku vokasionál hamutuk $6.750 ba benefisiáriu na’in-sia.
Agora orsamentu ba nível pasajen eskola ida hosi segundu klase Ensinu Sekundariu pasa ba kelas terseira klase hamutuk $17.500 ba benefisiáriu 35, hafoin bolsa méritu ba nível pasajen klase désimu ba tékniku vokasionál ho nia osan $7.500 ne’e koloka ba ema-15.
Bolsa méritu iha nível Munisipál ba treseiru siklu, Manatuto mós hetan osan $10.200 ba benefisiáriu na’in-lima (5)., bolsa méritu ba ensinu sekundáriu jerál nian $10.200 ba benefisiáriu na’in-lima no agora bolsa méritu nível munisipál ensinu sekundáriu tékniku vokasionál iha $10.200 ba benefísiu na’in-lima (5).
Ba bolsa méritu ba nível nasionál ba ensinu báziku no ensinu sekundáriu jerál ho ensinu sekundáriu tékniku vokasionál ne’ebé ho nia kolokasaun orsamentu hosi nasionál hamutuk $36.000.
Ensinu báziku to’o ensinu sekundáriu tékniku vokasionál ba primeiru lugar mak sei hetan $5.000, segundu klasifikasaun hosi nível ensinu tolu nian mak $4.000, terseiru klasifikasaun ba nível ensinu tolu mak $3.000.
“Ba nível ensinu tolu ne’e hotu, kada nível ita iha$2.000, tanba iha klasifikasaun datoluk entaun totál orsamentu hamutuk $36.000,” nia dehan.
Jornalista : Osória Marques
Editór : Cancio Ximenes
