COVALIMA, 05 maiu 2023 (TATOLI)–Prezidente Partidu Kmanek Haburas Unidade Nasionál Timor Oan (KHUNTO), Armanda Berta dos Santos, hateten bainhira povu fó konfiansa iha eleisaun parlamentar, KHUNTO hakarak sei dezenvolve setór edukasaun tanba edukasaun mak sai xave ba dezenvolvimentu nasionál.
Notísia Relevante: Kaer ukun, KHUNTO hakarak loke postu traballu ba Timoroan
“Povu fó konfiansa ba partidu KHUNTO iha eleisaun paralamentár sei esforsu ko’alia setór hotu-hotu hadi’a setór hotu hanesan saúde, edukasaun maibé tanba edukasaun sai xave ba dezenvolvimentu nasionál aliened setór saúde no ekonómia iha ita-nia nasaun,” Armanda Berta dos Santos hato’o promesa ne’e iha kampaña eleitorál ho tipu komísiu iha Kampu Ladi, sesta ne’e.
Setór edukasaun antes fó bolsa estrudu ba martir ho veteranu nia oan sira, maibe iha programa VIII Governu KOnstitusionál kria programa bolsa hakbiit ba kbiit laek nia oan sira, estudante iha valór hetan subsidiu hosi Estadu.
Alende setór eduksaun, nia dehan, sei haree mós ba setór sira seluk hanesan infraestrutura ne’ebé sei foku bee-moos, aea agrikultura sei haree ba irrigasaun nune’e agrikultór sira bele hasa’e produsaun iha rai-laran atu labele dependénsia ba importasaun no mós setór sira seluk tan.
Aleinde ne’e, programa idozu no invalidéz maibé programa VIII Governu troka ba pensaun sosiál liuhosi harii Institutu Nasionál Seguransa Sosiál, hodi haree sidadaun sira-nia direitu hadi’a subsídiu ba idozu no invalidéz, antes ne’e kada fulan $30.00 maibé agora sa’e ba $57.00.
Vise Koordenadór partidu KHUNTO munisípiu Covalima, Domingos Freitas, aprezenta relatóriu katak iha eleisaun parlamentár ne’e estrutura sei esforsu makaas iha baze, nune’e lori vitória ba partidu KHUNTO.
“Ha’u hakarak enkoraja estrutura iha munisípiu Covalima atu servisu makaas hodi fó votu ba partidu KHUNTO iha eleisaun parlamentár ne’e,” nia hateten.
Iha atividade kampaña ne’e observa hosi Ofisiál Komisaun Nasionál Eleisaun (CNE-sigla portugés), Provedoria Direitu Uumanus no Justisa (PDHJ) no hetan segurasan másímu hosi Polísia Nasionál Timor-Leste (PNTL).
Jornalista : Celestina Teles
Editór : Cancio Ximenes
