Loron mundiál parteira salva no kuida inan ho oan
DILI, 05 maiu 2023 (TATOLI) – Prezidente Asosiasaun Parteira iha Munisípiu Dili, Sara Maria Xavier, husu ba parteira sira atu nafatin salva no kuida inan ho oan liuhosi prevensaun bebé la bele mate iha kabun laran.
“Ohin loron mundiál parteira, husu ba parteira ida idak no fó hanoin fila fali ba sira katak sira nia papél no funsaun oinsá atu salva no kuida inan no oan sira atu prevene bebé labele mate iha kabun laran”, Sara Maria Xavier dehan bainhira remata atividade prátika ijiene liman moos iha resintu HNGV, ohin.
Nia informa, bainhira inan sira isin rua, labele fuma no labele besik ahi suar sira tanba sei fó impaktu boot ba bebé nia saúde iha inan nia kabun laran.
“Ami mós halo promosaun saúde no edukasaun ba inan isin rua atu labele fuma durante sira isin rua no mós atu fó hanoin ba sira nia parseiru sira no membru família sira ne’ebé mak hela hamutuk atu labele fuma, haleu ba inan isin rua sira tanba ida ne’e sei fó impaktu ba bebé nia saúde iha inan nia kabun laran”, nia afirma.
Sara Xavier husu ba inan isin rua sira atu labele besik liubá ahi suar sira iha dapur ne’ebé mak makas, ida ne’e fó impaktu ba bebé nia saúde iha inan nia kabun laran hanesan aban bainrua moris mai sei ibun sakat tanba impaktu mai husi ahi suar no sigaru suar sira.
“Tanba ne’e, husu ba inan sira labele besik liu ba ahi suar sira iha dapur ne’ebé mak makas ida ne’e fó impaktu ba bebé nia saúde iha inan nia kabun depois ba inan isin rua sira lao ba ne’ebé deit presiza uza maskara no han aihan ne’ebé mak nutritivu ne’ebé mak di’ak hodi fó nutrisaun ba bebé iha inan nia kabun laran”, nia esplika.
Nia husu ba inan sira nafatin monitór ka movimentu bebé nian liuhosi les surat tahan loron ida, bebé mínimu movimentu dala 12 ba leten bainhira menus husi ida ne’e bele hakbesik an mai lalais iha sentru saúde ne’ebé mak besik.
Nune’e mós, husu ba inan sira nafatin presiza konsulta antinatál kada fulan, atu nune’e bele deteta risku sira ne’ebé mak iha atu bebé labele mate iha kabun laran.
“Ami nafatin husu ba inan sira fulan hitu ba leten tenke toba fila ba sorin, labele toba haklenar bainhira toba haklenar mak hanehan tiha raan no nutrisaun ne’ebé oferese ba bebé liuhosi osijéniu la sufisisiente, bele kauza ba bebé mate”, nia subliña.
Totál parteira ne’ebé ativu iha Munisípiu Dili hamutuk 500, ne’ebé mak espalla iha Hospitál Nasionál Guido Valadares no mós iha sentru saúde sira.
Jornalista : Felicidade Ximenes
Editór : Zezito Silva
