AILEU,05 maiu 2023 (TATOLI) – Diretór Servisu Rejistu Notariadu Munisípiu Aileu, Frederico Paul Fátima, informa Servisu Rejistu Notariadu Munisípiu Aileu, apoia emite Bilete Identidade (BI) ba komunidade Ainaro no Manufahi tanba munisípiu rua ne’e afeta mákina ne’ebé avariadu.
“Durante ne’e ita mós fó atedimentu produsaun BI ba komunidade hosi Munisípiu Ainaro no Manufahi, sira mós mai halo BI iha ne’e no ita mós emite BI ba sira. Tanba haree ba mákina produsaun BI iha munisípiu rua ne’e sei avaria, entaun servisu rejistu notariadu autoriza atu komunidade hosi Ainaro no Manufahi bele mai prodúz sira nian BI ka halo sira nia BI iha Munisípiu Aileu”, Frederico Paul Fátima hateten ba TATOLI iha nia kan’ar fatin Aileu Vila, sesta ne’e.
Nia dehan, Aileu fó atedimentu BI ne’ebé la’o normál, laiha problema, tanba mákina (fargó) ba produsaun BI iha Aileu to’o agora di’ak hela.
“Ita-nia komunidade sira mai trata BI no Sertidaun Moris foti kedan nia orijiál la iha problema. dezde janeiru ita emite Bilete Identidade ba ita-nia komunidade sira hamutuk 2115 no Sertidaun Moris iha 590”, Frederico Paul Fátima dehan.
Nia informa, agora daudaun, blanku ba BI iha Munisípiu Aileu sufisiente hela, tanba iha orsamentu 2023, Diresaun Nasionál Rejistu Notariadu, Ministériu Justisa halo akizasaun ba blanku BI ba Munisípiu Aileu 1.000-resin.
“Maibé ita uza ona balun, agora ita halo hela pedidu ba Gabinete Diresaun Jerál Servisu Rejistu Notariadu atu halo tán akizasaun ba blanku BI”, Diretór Servisu Rejistu Notariadu, Munisípiu Aileu afirma.
Nia husu ba Ministériu Justisa atu hola jeladór atu bele ajuda servisu notariadu Munisípiu Aileu di’ak liután.
“Ami iha funsionáriu permanente nain ualu, iha nain 16 mak foin rekruta nudar funsionáriu kazuál garantia servisu atendimentu ba komunidade sira iha ne’e, maibé difikuldade ida ba ami mak ahi kuandu mate, atendimentu BI labele lao”, nia dehan.
“Tanba ne’e nian husu, sé bele Governu disponibiza ba ami jeradór atu ahi mate karik prosesu atendimentu ba BI kontinua lao nafatin tanba hanesan ami iha Aileu ahi mate hela de’it”, nia konklui.
Jornalista: Natalino Costa
Editór : Zezito Silva
