MANUFAHI, 05 maiu 2023 (TATOLI) – Prezidente Partidu Demokrátiku (PD) Mariano Assanami Sabino, kompromote katak bainhira PD ba kaer ukun mak sei realiza formasaun ba joven sira iha lian Korea, Ingles, Portugés no seluk tan, la’os iha nasionál de’it maibé loke mós iha área remota sira atu povu nia oan hotu bele asesu hodi bele servisu iha rai-laran no rai-liur.
“Ita hakarak fó formasaun língua sira iha leten, tun to’o ba kraik hanesan Korea, Ingles no seluk, tenke to’o iha nível aldeia no suku sira atu ita-nia joven sira bele asesu ba servisu iha rai-laran no rai-liur”, Assanami dehan iha kampaña PD nian ho tipu komísiu iha Luak Manufahi, sesta ne’e.
Nia dehan, PD sei kria mós kampu traballu ba joven sira iha rai-laran, la’os de’it ba rai-liur maibé joven sira hakarak ba servisu iha rai-liur PD nafatin fasilita liuhosi meiu oioin ne’ebé iha.
“Ita mós sei loke oportunidade ba joven sira atu ba servisu iha rai-liur iha nasaun barak maibé Estadu mak tenke halo kontratu atu ita bele iha kontrolu ba ita-nia ema sira, la’os hanesan agora ita-nia ema sira ba toba lemolemo iha Portugal ne’ebá iha tan jardin, ida ne’e ita la fó dignu ba ita-nia alin sira”, nia revela.
Aleinde ne’e, hanesan joven kontinuadór hodi servi ba nasaun ida ne’e hato’o parabens ba joven hotu ne’ebé ba servisu iha Inglaterra, Irlandia, Korea Súl, Australia no seluk tan tanba kontribuisaun joven hirak ne’e nian mak konsege harí uma mutin barak iha foho iha área rurál sira.
“Fó parabens ba imi traballadór hotu iha rai-liur, imi-nia luta bo’ot tebes, imi mak eroi foun ba nasaun ne’e konta mós ho imi, imi-nia rejultadu mak ohin loron uma mutin harii kintu kantu iha foho sira, im-nia kontribuisaun ba dezenvolvimentu nasaun nian di’ak tebes”, nia hakotu.
Kampaña ba partidu politika ne’e hetan seguransa másimu hosi Polísia Nasionál Timor-Leste (PNTL) Munisípiu Manufahi, hetan supervizaun direta hosi Komisaun Nasionál Eleisaun (CNE-sigla portugés) no monitoriza hosi Provedoria Direitu Humanu no Justisa (PDHJ).
Jornalista: Hortencio Sanchez
Editór : Zezito Silva
