PD sei dezenvolve setór agríkula iha Manufahi bainhira envolve iha Governu
MANUFAHI, 05 maiu 2023 (TATOLI) – Prezidente Partidu Demokrátiku (PD) ho númeru sorteiu 4, Mariano Assanami Sabino, hateten PD bainhira povu fó fiar hodi envolve iha Governu da-sia mak sei tau importánsia liubá setór agríkula iha Munisípiu Manufahi.
“Manufahi rai istóriku, rai ida ne’ebé mak inisiadór ba luta libertasaun hosi Dom Boaventura, ida ne’e mak PD sempre la’o tuir nia ain fatin ne’ebé iha ne’e, iha Manufahi ne’e setór agríkula mak importante liu tanba populasaun barak mak moris iha vida ida ne’e, entaun ita presiza dezenvolve makas iha setór ida ne’e”, Prezidente Assanami dehan ba Agência TATOLI iha Same hafoin hakat ba Luak hodi halo atividade kampaña, sesta ne’e.
Nia dehan, iha Manufahi poténsia ba agríkula tanba iha kafekultura, ai-horis oi-oin ne’ebé bele kuda iha munisípiu ne’e mak hanesan ai-kameli, ai-kaharu no ai hirak ne’ebé bele dezenvolve.
Aleinde ne’e, Manufahi mós sai prioridade ba setór peska tanba ho nia tasi ne’ebé luan ho nune’e PD mós tau importánsia ba peska nian atu dezenvolve liután.
“Iha Manufahi ne’e tasi mós luan tebes kompara 3X ho rai maran maibé durante ne’e ita seidauk dezenvolve ho di’ak, ho nune’e importante tebes ba ita atu dezenvolve ida ne’e”, nia dehan.
Ho nune’e, PD tau mós tau importánsia ba setór turizmu iha Munisípiu Manufahi tanba iha foho ne’ebé furak no bee matan ne’ebé no paizajen furak bele transforma mós ba osan.
Atu hadia setór turizmu, PD sei tau uluk importánsia hodi hadia infraestrutura bázika hanesan hadia estrada lokál no rurál sira, tanba antes ne’e Governu fó atensaun hodi hadia de’it dalan rejionál sira, ho nune’e asuntu ne’e sai mós prioridade ba PD atu fó atensaun bainhira kaer ukun.
“Atu eleva programa hirak ne’e hotu, ita mós tenke reforsa liután suku, aldeia, komunidade atu reforsa estrutura ne’e metin liután oinsa dezenvolvimentu suku ne’e la’o atu reforsa liu ekonomia, komérsiu indústria ne’e tenke la’o makas, kooperativa tenke sai setór ida ne’ebé permanente atu sosa produtu agríkula sira ne’e”, nia hakotu.
Jornalista: Hortencio Sanchez
Editór : Zezito Silva
