PLPA la konsege halo kampaña eleitorál iha Cribas
MANATUTO, 05 maiu 2023 (TATOLI)—Adjuntu Sekretáriu Jerál Partidu Liberta Povu Aileba (PLPA), João Paulo Adito Pereira, hateten PLPA ohin labele realiza kampaña ho tipu diálogu iha Cribas-Manatuto maibé PLPA halo de’it kampaña ho tipu door-to-door.
“Ohin, ami muda diálogu no ohin ami PLPA halo kampaña hoi tipu door-to-door nian iha Cribas, suku Orlala, Laclubar, tanba kestaun tékniku balun ne’ebé ami muda maibé door-to-door agora la’o hela,” João Paulo hatete ba Agência Tatoli liuhosi telefónika, sesta ne’e.
Ba eleisaun lejizlativa, nia dehan, iha munisípiu Manatuto ne’e PLPA iha prioridade rua mak fábrika indústria no turizmu.
“Ami iha prioridade rua. Ida mak halo fábrika indústria maibé indústria ne’e ami halo liuhosi kooperativa mak sei organiza ema nune’e realiza. Seluk fali ita konvida kompañia nasionál ka Internasionál depois tolu Governu mak halo rasik hanesan badan usaha milik negara. Karik povu fó fiar ba PLPA,” nia hateten.
Prioridade rua mak halai liu turizmu tanba Manatuto iha paisajen di’ak mak PLPA hanoin halo infraestrutura bázika, nune’e atrai vizitante nasionál no Internasionál nian tanba Manatuto iha turizmu natureza no turizmu istória relijiozu nian.
“Maibé, ida-ne’e mós presiza halo kompleta ho nia fasilidade ne’ebé seguru, nune’e ema bele vizita hodi fó reseita,” nia dehan.
Tanba ne’e, nia husu ba militante no simpatizante inklui povu Manatuto tomak atu iha eleisaun lejizlativa ne’ebé sei akontese 21 maiu 2023 mak fó konfiansa ba PLPA, mak sei implementa programa prioridade rua ne’e iha Manatuto.
Jornalista : Osória Marques
Editór : Cancio Ximenes
