OÉ-CUSSE 05 maiu 2023 (TATOLI) – Prezidente Autoridade Rejiaun Administrativa Espesiál Oé-cusse Ambeno (RAEOA), Arsénio Paixão Bano, informa, polítika rekruta funsionáriu estajiáriu hanaran Ami Prontu Servisu (APS), ho objetivu atu hasa’e koñesimentu muda mentalidade no responsabilidade molok integra-aan sai funsionáriu iha Estadu.
“Sira-nia orsamentu ita planu ona, tinan ne’e atu rekruta na’in-700, tanba osan ne’e aprova ona hosi Parlamentu Nasionál, entaun tinan ne’e ita hahú programa ne’e, ‘Ami Prontu Servisu’ tenke voluntáriu uluk mak hafoin loke konkursu atu kompete,” Arsénio Paixão Bano, ko’alia iha Oé-Cusse, sesta ne’e.
“APS ne’e sira la tama tuir prosesu rekrutamentu, maibé kolokasaun de’it, hanesan estájiu maibé autoridade selu, prepara ita-nia joven sira, liuliu graduadu no remata sekundáriu, sira-ne’ebé seidauk hetan kampu traballu, bele mai estájiu maibé hetan direitu, bainhira iha rekrutamentu sira bele iha ona esperiénsia oinsá serbisu iha instituisaun Estadu,” nia katak.
Tuir nia, mandatu ba estájiu durante fulan neen to’o tinan rua, maka autoridade sei loke konkursu públiku, sira bele ba partisipa iha konkursu ne’e, no tenke iha sertifikadu estajiáriu durante dedikasaun iha APS ne’e.
“Ne’e maka hanaran Ami Prontu Servisu, ida-ne’e mós atu muda mentalidade ema, disiplina, pontualidade no responsabilidade, bainhira tama no sai serbisu tenke kumpri oras, tenke dedika-aan serbisu ba RAEOA ba Timor-Leste, ida-ne’e mak ita hahú,” nia afirma.
“Ita sei koloka sira ba setór hotu-hotu, ba agrikultura bele ba guarda floresta no estensionista sentru viveru sira iha fatin-fatin, ba saúde públiku bele tama iha postu saúde no sentru saúde atu apoia serbisu médiku sira, iha serbisu ba administrasaun área komérsiu indústria, ba edukasaun, ita aumenta tán pesoál administrasaun jardineiru lojístika, ne’ebé setór hotu-hotu sei koloka iha ne’ebá, inklui portu aeroportu, ho servisu esensiál sira hanesan projetu bee-moos no eletrisidade,” nia katak.
Arsénio Paixão Bano, hatete, daudaun ne’e, joven kuaze na’in-200 submete ona dokumentu, iha ona faze verifikasaun, nune’e iha tempu badak bele hahú ona serbisu iha instituisaun hotu-hotu iha Oé-Cusse.
“Polítika sei iha nia kontinuasaun, tanba Autoridade RAEOA hakarak dudu joven sira ne’ebé remata estudu maibé seidauk hetan kampu traballu, entaun Autoridade prepara kampu traballu atu kontribui servisu ba nasaun Timor-Leste, maibé Estadu,” nia katak.
Jornalista: Abílio Elo Nini
Editór: Evaristo Soares Martins
