ERMERA, 05 maiu 2023 (TATOLI) – Partidu Demokrátiku (PD) promete sei hatuun taxa nesesidade bázika hodi reforsa komunidade nia forsa atu sosa nesesidade bázika.
“Ita sei hatuun taxa ba nesesidade bázika atu inan-aman sira bele iha kapasidade hodi sosa fós, sosa mina, sosa masin-midar, no nesesidade bázika seluk,” Sekretáriu Jerál PD Munisípiu Ermera, Domingos Mariano Reis hato’o PD nia kompromisiu ne’e iha kampaña dialógu komunitária, iha Aldeia Poerema, Suku Fatubolu, Postu administrativu Hatulia B, Munisipiu Ermera, sesta ne’e.
Nia dehan, presu nesesidade bázika kontinua sa’e ba bebeik, no halo inan-aman barak iha área rurál la iha kbi’it sufisiente hodi sosa nesesidade bázika sira, liu-liu ai-han.
“Taxa nesesidade bázika agora daudaun entre porsentu 5 to’o 7. Entaun presu nesesidade báziku sa’e no inan-aman sira labele sosa,” Domingos esplika.
Líder ne’e hatutan, bainhira laiha kapasidade atu sosa nesesidade bázika mak lori risku má-nutrisaun ba labarik ki’ik fulan ne’en to tinan lima.
“Inan-aman sira iha área rurál barak mak laiha osan atu sosa fós. Entaun ida ne’e sei fó risku liu-liu má-nutrisaun ba labarik sira. Se labarik sira la konsumu etu, na’an, manu-tolun no susu-been, entaun má-nutrisaun sei aumenta,” Domingos esplika.
Nia informa, iha Munisípiu Ermera, 61% husi labarik fulan ne’en to’o tinan lima sofre má-nutrisaun, tanba ne’e nia konsidera hamenu taxa ne’e buat ida urjenti tebes “Entaun, hatuun taxa ne’e urjente no tenke halo lalais. Ita hatuun taxa para sasan folin tuun no inan-aman no komunidade sira bele sosa nesesidade bázika”.
Jornalista: Filomeno Martins
Editora. : Nelia Borges
