PLP hakarak sai riin ba povu no nasaun
MANATUTO, 06 maiu 2023 (TATOLI)—Partidu Libertasaun Popular (PLP) ho númeru sorteiu tolu (3) ne’ebé lideradu hosi Jenerál Taur Matan Ruak, sábadu ne’e, halo kampaña eleitorál ho tipu diálogu ne’ebé realiza iha postu administrativu Laclo, munisípiu Manatuto.
Notísia Relevante: PLP hakarak transforma Batugade sai interpostu komersiál
Koordenadór Partidu Libertasaun Popular (PLP) iha Laclo, Francisco de Assis Correia, hateten bainhira povu Manatuto liu-liu povu Laclo fó konfiansa ba PLP iha eleisaun parlamentár ne’e mak PLP hakarak sai riin ba nasaun no povu ida-ne’e no la’ós atu ukun.
“Baibain ita-nia Prezidente PLP, Taur Matan Ruak, hateten katak ha’u hakarak sai riin, la’ós atu ukun. Entaun, ho ida-ne’e hatudu katak Taur Matan Ruak hadomi nia povu no nia hakarak povu tenke moris dignu no di’ak, no povu iha Laclo ne’e rasik PLP tau prioridade liu ba bee-moos, eletrisidade, Estrada,” nia hateten ba Agencia Tatoli hafoin hal’ao diálogu ho komunidade Lacco iha Laclo.
Nia hatutan, povu tenke moris di’ak mak PLP tau prioridade liu ba infraestrutura bázika sira, nune’e husu ba militante no simpatizante sira atu hili PLP sai riin no mahon ba povu Timor-Leste.
Vise Prezidente Partidu Libertasaun Populár (PLP), Maria Angelina Sarmento, hateten PLP mak re-ativa arte marsiál nune’e imi-ne’ebé involve iha iha arte marsiál tenke hatutan informasaun ba imi-nia maluk hodi tetu no hili.
“Imi juventude mak ajente dezenvolvimentu nasionál, tanba ne’e husu ba povu Laclo atu vitória ba PLP nune’e tau importánsia ba juventude hotu-hotu iha Timor-Leste. Tanba, imi hatene katak foin lalais Governu apoiu osan besik miliaun $3 hodi harri imi-nia sede no halo atividade arte marsiál nian,” nia hateten.
Aleinde ne’e, nia kompromete atu kontinua fó bolsa estudu ba povu kbiit laek sira-nia oan hodi asesu ba edukasaun no kréditu ba estudante sira-ne’ebé asesu ba universidade no bainhira eskola hotu, serbisu mak selu fali atu hakma’an inan-aman sira-ne’ebé kbiit laiha osan hodi selu oan sira-nia eskola.
Jornalista : Osória Marques
Editór : Cancio Ximenes
