MANATUTO, 06 maiu 2023 (TATOLI)—Diretór Servisu Edukasaun Munisípiu Manatuto, Graciano de Jesus Baptista, hateten iha tinan ida-ne’e Servisu Edukasaun Munisipál hetan projetu ualu (8) hosi nasionál liuhosi Projetu Konstrusaun Reabilitasaun Eskolár sei sei reabilita ensinu pre-eskolár haat no konstrui ensinu báziku haat.
“Iha tinan ida-ne’e, ita Servisu Edukasaun Munisipál manán projetu liuhosi Projetu Konstrusaun Reabilitasaun Eskolár. Hosi nasionál, ita hetan projetu ualu (8) mak ba iha ensinu pre-eskolár iha haat no konstrusaun ensinu báziku iha haat. Maibé, projetu ida ho nia osan boot loos entaun nia sei iha ADN mak konstrusaun edifísiu eskola ida no reabilitasaun eskola ida,” nia hateten ba Agéncia Tatoli iha nia kna’ar fatin, foin lalais ne’e.
Projetu ne’e la’ós empreza mak halo maibé projetu ne’e komunidade mak sei halo, tanba osan maihusi MEJD nune’e sei fó ba komunidade mak halo.
“Osan ba projetu ne’e boot maibé ita-nia komunidade mak jere. Tanba ami haree projetu iha kualidade no tuir duni estandarizasaun ne’ebé enjiñeiru sira fó no mós hosi AND, inklui parte MEJD nian,” nia hateten.
Projetu Konstrusaun no Reablitasaun Eskolár bele kontribui hadi’a kualidade setór edukasaun iha rai-laran hodi prepara futuru estudante sira-nian, atu bele dezenvolve Timor-Leste sai nasaun ida-ne’ebé prósperu.
Antes ne’e, iha 17 abríl, Primeiru-Ministru (PM), Taur Matan Ruak, inaugura ona infraestrutura edukativa hamutuk 59 ne’ebé konstrui no reabilita hosi Ministériu Edukasaun, Juventude no Desportu (MEJD) liuhosi projetu komunitária tinan 2021-2022.
Eskola sira-ne’ebé inaugura iha munisípiu sira ma iha Aileu tolu (3), Ainaru tolu (3), Baucau lima (5), Bobonaro rua (2), Covalima sia (9), Dili ualu (8), Ermera hitu (7), Lautém hitu (7), Liquiça tolu (3), Manatuto rua (2), Manufahi lima (5) no Viqueque lima (5).
Infraestutura edukativa hirak-ne’e mai hosi nível pre-eskolár to’o sekudáriu jerál ho totál sala-de-aula 191, casa de banho 36, sala profesor 21, eskritóriu neen (6), kuziña ualu (8), laboratóriu IT rua (2) no moru protesaun rua 2), ho orsamentu ne’ebé ezekuta ba obra ne’e kuaze millaun $6,4 hosi orsamentu jerál estadu 2021.
Totál projetu komunitária tinan 2021-2022 ne’ebé Governu implementa iha territóriu nasionál hamutuk 228, kompostu hosi konstrusaun foun 218 hanesan sala-de-aula 754, sala profesór 93 no haris fatin 81.
Entretantu, projetu reabilitasaun ba eskola iha territóriu nasionál hamutuk eskola 10, sala-de-aula 57, sala profesór lima (5) no hariis fatin tolu (3) ho totál orsamentu millaun $29.
Jornalista : Osória Marques
Editór : Cancio Ximenes
