KOVALIMA, 06 Maiu 2026 (TATOLI)- Vise Prezidente Komisaun F iha Parlamentu Nasionál, Leandro Lobato, husu ba Autoridade Munisípiu Kovalima ezekuta Orsamentu Jerál Estadu (OJE) 2026 ho responsabilidade, nune’e povu bele hetan benefisiu.
“Ami apresia liga ba ezekusaun OJE $9,517.979 nia ezekusaun atinje ona 29% signifika ezekuta orsamentu ho di’ak másimu, maibe ezekuta ho responsabilidade lá haree ba kuantidade, maibé haree ba kualidade ezekusaun”, Vise Prezidente Komisaun F Parlamentu Nasionál Leandro Lobato hato’o bainhira enkontru ho autoridade Kovalima iha salaun AMC .
Ho nune’e, Nia husu ezekuta orsamentu tuir programa, sub programa no atividade iha munisípiu Kovalima hodi responde ba preokupasaun komunidade.
Iha fatin hanesan, Prezidente Autoridade Munisípiu Kovalima, Miguel Armada Cardoso, aprezenta katak Parlamentu Nasionál aprova orsamentu mai iha Kovalima hamutuk $9,517.979 husi orsamentu nia ezekusaun atinje ona 29%.
“Orsamentu Jerál Estadu (OJE) 2026 aloka mai ami hamutuk $9,517.979 ne’ebé prevee ba saláriu no vensimentu $2,203.227, sasan no servisu $841.730, tranferensia publika $4.961.588 kapitál menór rihun $300 no kapitál Dezenvolmentu $22.111.46,” nia informa.
Orsamentu saláriu hodi finansia ba funsionáriu permanente hamutuk 300, funsionáriu ajente 94 no Funsionáriu kazuál 242. Ezekusaun orsamentu kapitál menór ho kapitál Dezenvolvimentu nia ezekusaun prosesu la’o hela. Iha planu Asaun Anual 2026 munisípiu Kovalima iha nia programa 16, sub programa 40 ho nia atividade 90.
Komisaun F Parlamentu Nasionál husu Autoridade Kovalima atu partilla informasaun kona-ba lei adosaun ba labarik sira ba komunidade sira iha Kovalima.
Sosializa lei Adoasaun labarik ba komunidade
Prezidente Komisaun F Parlamentu Nasionál, Maria Guromali Barreto, dehan iha 2025-2026, Komisaun F avansa ho lei adosaun ba labarik,prosesu halo lei la’os hakerek tiha mak lori ba PN liuhusi prosesu naruk halo konsultasaun ho entidade sira lei kuaze tinan ida foin hetan aprovasaun.
“ Ha’u hakarak informa katak, ita iha ona lei prosedimentu adosaun ba labarik husu ita boot sira atu partilla informasaun katak kualker se deit, mai iha komunidade nia leet husu atu halo adosaun ba labarik tenke bazeia ba lei ne’ebé mak iha,” katak Prezidente Komisaun F Parlamentu Nasionál, Maria Guromali Barreto, hato’o hafoin enkontru ho Autoridade sira iha Kovalima.
PN aprova ona lei referidu no la hakerek tama entre en vigora,maibé fó tempu ba governu halo preparasaun durante loron 180 tama entre en vigór
Bazeia ba ajenda ne’ebé mak Tatoli asesu prezensa komisaun F PN iha munisípiu Kovalima mak hanesan iha loron Kuarta-ne’e halo vizita fiskalizasaun, postu saúde sira no sentru Saúde, iha munisípiu Kovalima no mos observa armazein sentru Solidariedade Sosial no inkluzaun,vizita servisu Munisipál Saúde no vizita grUpu benefisiáriu fundu rotativu.
Jornalista:Celestina Teles
Editór: Florencio Miranda Ximenes
