LAUTÉM, 07 maiu 2023 (TATOLI)-Partidu Dezenvolvimentu Nasionál (PDN), liuhusi telekonferénsia, kompromete sei dezenvolve área protejida Nino Konis Santana no Illa Jaco sai hanesan destinasaun turístika hodi atrai turista lokál no turista internasionál sira hodi mai vizita fatin refere hodi fó rendimentu ba komunidade Lautém no Tutuala hodi diversifika ekonomia ba povu nia moris di’ak.
“Ita sei dezenvolve área turístika ho integradu mak hanesan hadi’a estrada ne’ebé liga ba área protejida Nino Konis Santana, infraestura ba illa Jaco ne’ebé kompletu ho sanitasaun ho bee moos hodi atrai turista lokál no turista internasionál hodi mai vizita iha fatin refere hodi fó rendimentu ekonomia sustantável ba komunidade Lautém,” Sekretariu jerál PDN, Lukas Soares Coli Bere, informa ba TATOLI liuhosi telefone, ohin.
Nia esplika, alende dezenvolve Nino Konis Santana no Jaco, sei dezenvolve mós fatin turístiku sira seluk mak hanesan Com, Lori, Iralalaru atu sai hanesan destinasaun turista ho nune’e bele diversifika ekonomia família husi baze hodi kontribui ba prosesu dezenvolvimentu nasionál iha Timor – Leste.
Tanba ne’e, liuhusi telekonferénsia, PDN husu nafatin Povu Lautém hili PDN ho númeru sorteiu 1 liuhosi Eleisaun Parlamentár 21 maiu 2023 hodi ba kaer ukun atu bele konkretiza kompromísiu polítika ba Povu tomak nia moris di’ak iha Timor – Leste.
Iha parte seluk, tuir kalendáriu Komisaun Nasionál Eleisaun (CNE), PDN sei hala’o kampaña polítika iha Munisípiu Lautém, Postu administrativu Lospalos, ohin, maibé la konsege realiza no dirije de’it telekonferénsia husi nasionál ba povu, militante no simpatizante sira iha Tutuala.
Sekretáriu jerál PDN, Lukas Soares Coli Bere, informa ba TATOLI, liuhosi telefone hateten katak PDN, la konsege realiza kampaña ho tipu dialógu iha Munisípiu Lautém, Postu administrativu Lospalos tanba fallansu tékniko maibé kompromísiu politika ba programa prioridade nafatin hato’o liuhosi telekonferénsia ba povu iha Tutuala.
“Maski estrutura nasionál PDN la halo kampaña polítiko iha Munisípiu Lautém, Tutuala, iha domingu (07/05) maibé nafatin dirije programa prioridade liuhosi telekonferénsia ba povu, militante no simpatizante sira iha Tutuala,” Sekretáriu jerál PDN, Lukas Soares Coli Bere informa.
Jornalista : Camilio de Sousa
Editora : Nelia Borges
