ATAÚRU, 07 maiu 2023 (TATOLI)- Partidu Unidade Dezenvolvimentu Demokrátika (PUDD) hakarak transforma karakter juventude hodi dezenvolve setór turizmu no peska hodi redús númeru dezempregu iha munisípiu Ataúru.
Prezidente PUDD, Silvestre Xavier Sufa, hateten, PUDD hakarak juventude sai pilar importante hodi kontribui ba dezenvolvimentu iha munisípiu Ataúru sai fatin potensiál ba turístiku no mós peska.
“Ita hakarak estabelese sentru formasaun ida hodi transforma karakter juventude Ataúru, hodi bele kontribui ba dezenvolvimentu iha setór turizmu no peska,’’ Presidente PUDD, Silvestre Xavier Sufa informa ba jornalista sira iha suku Beloi, domingu nee.
Presidente hatutan tan PUDD hakarak atu transforma sekretáriu estadu Professional no Empregu (SEFOPE) sai Ministériu ida atu responde ba juventude sira nia preokupasaun, no menus serbisu iha rai laran.
PUDD hakarak atu apoiu kréditu ba joven sira iha rai-laran no mós ba sira ne’ebé serbisu ona iha rai-laran no fila mai Timor-Leste atu kria empregu ba sira nia aan rasik, no mós bele fó serbisu ba ema seluk.
PUDD hakarak sosa ró peska ba komunidade Ataúru atu bele hala’o peska hodi fornese ikan ba komunidade iha nível nasionál hodi, kontribui ba ekonomia família no mós hasa’e kresimentu ekonomia rai laran.
“Ita iha responsabilidade morál atu tulun joven sira, hodi muda sira-nia mentalidade husi karakter in morál maibé tenke foka ba dezenvolvimentu nasionál,’’ Nia esplika
Sekretáriu jerál PUDD, Aleixo De Carvalho, sei tau mós prioridade ba infraestrutura estrada iha munisípiu tanba agora sai ona munisípiu espesiál ida.
“Ita haree katak munisípiu Ataúru sidauk iha alkatraun metru ida. Ita triste haree situasaun reál iha munisípiu nee. PUDD iha vontade atu hadi’a tau osan atu hadi’a infraestrutura iha munisípiu naran,’’ nia esplika
Alende nee PUDD iha mós hakarak implementa programa prinsipál balun hanesan turizmu, peska, Estrada, bee moos, transportasaun marítimu no seluktan.
Sekretáriu Jerál ne’e enkoraja ba militante no simpatizante sira atu bele vota ba partidu PUDD, hodi moris diak ba joven sira no mós povu iha munisípiu Ataúru.
Iha atividade Kampaña no tipu diálogu husu membru CNE, observadór JPIC no apoiu seguransa husi membru Polisia Nasionál Timor-Leste (PNTL) munisípiu Ataúru.
Partidu Polítiku PUDD no númeru sorteiu kumpre duni oráriu kampaña no tipu diálogu ne’ebé mak anunsia ona husi Komisaun Nasionál Eleisaun (CNE, sigla portugés) hodi fó biban ba PUDD atu realiza atividade diálogu ne’e iha Aldeia Maker suku Beloi munisípiu Ataúru.
Jornalista : José Belarmino De Sá
Editora : Nelia Borges
