LAUTÉM, 07 maiu 2023 (TATOLI)- Partidu polítiku ho númeru sorteiu 16, Partido Democrata Cristão, bazea ba kalendáriu Komisaun Nasionál Eleisaun (CNS, sigla portugés), tuir lolos hala’o mini kampaña iha Munísipiu Lautém, Lospalos vila, ohin, maibé la konsege realiza no hala’o de’it konferénsia imprensa iha munisípiu Baucau, diriji ba militante no simpatizante sira iha munisípiu Lautém.
Prezidente PDC, Francisco Araújo, liuhosi telefone hateten katak PDC la realiza kampaña polítika iha Munisípiu Lautém, Lospalos vila maibé halo de’it kampaña liuhosi komunikadu imprensa iha Munisípiu Baucau hodi hato’o programa prioridade ne’ebé sei realiza iha Timor – Leste karik povu hili liuhosi Eleisaun Parlamentar ne’ebé sei realiza iha 21 maiu 2023.
“Ekipa nasionál la realiza kampaña iha Munisípiu Lautém tanba distánsia ne’ebé dook ho nune’e ami konsentra de’it iha Baucau no hato’o programa kampaña polítika PDC nian ba militante no simpatizante sira iha Munisípiu Lautém liuhosi komunikadu imprensa,” Prezidente PDC Francisco Araújo, informa iha domingu ne’e.
Entertantu, programa prioridade ne’ebé sei implementa iha Timor – Leste karik PDC hetan fiar husi povu mak hanesan:
- Investe Orsamentu Estadu ba dezenvolvimentu setór turizmu iha Timor-Leste hanesan fatin públiku sira, fatin rezisténsia, turizmu komunitária, relijioza, kulturál, foho, tasi-laran no tasi-ninin, souvenirs, fasilidade saneamentu públiku, desportu liuliu fatin poténsia sira hanesan Foho Ramelau, Mundu Perdido no Matebian, Bee-manas Marobo, Ataúru, Jaco, Ponte Natureza, Bee Manas, no selukluk tan.
- Iinisiativa joventude sira ne’ebé promove ona sira nia kreatividade hodi dezenvolve fatin turizmu komunitária iha territóriu laran tomak.
- Fatin turizmu hotu, autoridade lokál hanesan Xefe suku ho Xefe Aldeia mak sei jere no tau-matan, no mós serbisu hamutuk ho juventude sira.
- Asegura seguransa seguru iha fatin turístika hotu iha rai-laran no promove ambiénte saudável.
- Garante ekoloja sustentável hodi asegura rai ne’ebé produtivu hodi prezerva ba produsaun sira iha tempu naruk.
- Promove no konserva uma-lisan no atividade tradisionál sai atratitivu ba turizmu.
- Fatin turizmu hotu tenki prepara kondisaun hanesan otel, restaurante, losmen, bee moos no seluktan.
- Garante turizmu komunitáriu hotu, sai alternativa ba juventude sira hotu, hodi redus númeru dezempregu.
Ho nune’e, PDC husu ba povu Lautém atu hili PDC ho númeru sorteiu 16, iha Eleisaun Parlamentár 21 maiu ne’e atubele realiza programa hirak ne’e hodi hadi’a povu nia moris iha Timor – Leste.
Jornalista : Camilio de Sousa
Editora : Nelia Borges
