PD kompromete promove kafé iha mundu
ERMERA, 07 maiu 2023 (TATOLI) – Organizasaun polítika ho lema “Harii Nasaun husi Baze” – Partidu Demokrátiku (PD), durante kampaña eleitorál, iha Gleno, Munisípiu Ermera, kompromete sei promove Kafé Timór iha mundu hodi hamorin kafé orgánika Timór ne’ebé mak ho kualidade aas.
Prezidente partidu, Mariano Assanami, iha ninia intervensaun, hato’o katak Timor-Leste presiza estabelese empreza estatál hanesan Hotel Timor iha nasaun hotu-hotu hodi promove kafé Timór.
Alende halo promosaum kafé Timor, tuir líder partidu ho sorteiu nú. 4 ne’e, dehan, Timor-Leste presiza iha ninia brand kafé rasik.
“Ita tenke iha fábrika kafé rasik, kria indústria rasik no brand rasik atu nune’e ita bele fa’an iha nasaun seluk,” Asanami hato’o iha kampaña PD perante militante no simpatizante sira.
Líder másimu PD ne’e hateten, Timor-Leste mós presiza kontinua halo reabilitasaun no kuda kafé foun hodi hasa’e produsaun ba kafé ne’ebé tuan ona.
Assanami haktuir katak kafé Hibridu Timór nia orijin mai husi Ermera, ho nune’e, nia husu ba kafekultór sira atu kuda espesie kafé refere tanba iha rezisténsia ba moras no pesti. “Kafé ne’e agora espalla ona iha mundu tomak, inklui Vietnam, Amérika Latina, no Áfrika. Maibé, ita Timór rasik seidauk kuda no espalla kafé ne’e.”
Iha fatin hanesan, Sekretáriu jerál PD, António da Concição ‘Kalohan’ husu ba militante no simpatizante Ermera atu vota ba PD hodi hadi kafekultór sira-nia moris.
“Ermera de’it mak iha kafé ho kualidade aas iha mundu. Maibé, Ermera laiha oportunidade atu hadi’a ita-nia moris tanba kafé folin la di’ak. Entaun, imi-nia votu fó ba PD iha 21 maiu para hadi’a ida ne’e,” Kalohan akresenta.
Jornalista : Filomeno Martins
Editora : Nelia Borges
