AINARO, 07 maiu 2023 (TATOLI) – Partidu Demokrátiku (PD) liu husi desizaun koletivu partidu nian deside adia kampaña eleitorál iha munisípiu Ainaro, tanba mudansa oráriu.
Tuir oráriu husi CNE, PD realiza nia kampaña aberta, iha Kampu Futebol, Ainaro Vila, iha 07 maiu.
“Motivu husi kansela kampaña ne’e, tanba tuir lolos, kampaña PD-nian iha munisípiu Ermera sei realiza, iha loron 13 maiu, maibé, tanba loron prosesaun muda fali Ermera nian mai iha ohin domingu (07/05) no Ainaro nian ami foti ona desizaun hodi muda fali ba sesta-feira (12/05). Ne’e desizaun koletivu husi nasionál”, informa Sekretáriu Ezekutivu PD, Fernando Barros Gusmão, ba Ajénsia Tatoli via telemóvel, domingu ne’e.
Nia dehan, PD haruka ona karta ba CNE nasionál ho munisipál hodi informa kona-ba mudansa ba oráriu ne’e.
Iha sorin seluk partidu Movimentu Libertasaun Povu Maubere (MLPM) kansela mós kampaña ho tipu komísiu no dor to dor iha Ainaro, tanba realiza de’it konferénsia imprensa iha sede nasionál partidu nian iha Dili.
Tuir oráriu husi CNE, MLPM realiza nia kampaña aberta no dor to dor, iha Kampu Futebol, Ainaro Vila, iha 07 maiu.
“Ami kansela, tanba iha asuntu importante, nune’e ami realiza de’it konferénsia imprensa iha Dili”, Przidente Partidu MLPM, Reis Kadalak, informa ba ajénsia Tatoli via telefone, ohin.
Kestiona kona-ba bainhira mak partidu ne’e sai mai halo fali kampaña iha munisípiu Ainaro, dirijente ne’e lakohi fó komentáriu.
Relasiona ho assuntu ne’e, Diretór CNE munisípiu Ainaro, Feliciano da Costa dos Santos, hateten CNE simu ona informasaun husi dirijente PD nian, enkuantu kona-ba partidu MLPM diretór ne’e hateten sira kontaktu ona ba responsável partidu nian hodi konfirma motivu husi kansela kampaña ne’e iha munisípiu Ainaro, maibé la atende telefone.
Jornalista: Afonso do Rosário
Editora: Isaura Lemos de Deus
