AILEU, 07 maiu 2023 (TATOLI) – Prezidente Partidu Kongresu Nasionál Rekonstrusaun Timorense (CNRT, sigla portugés), Kayrala Xanana Gusmão, kompromete katak CNRT bainhira manán iha Eleisaun Parlamentár tinan ne’e, sei tau prioridade dahuluk mak implementasaun polítika dezentralizasaun poder lokál, hodi bele hadia ekonómia nasaun no povu nia moris iha baze.
“Ita manán mak ita hakarak hakbesik Governu mai povu liuhosi implementasaun dezentralizasaun poder lokál. Ida ne’e mak programa prioridade tinan lima mai. Ita sei implementa iha munisípiu hotu”, Xanana Gusmão hateten iha komísiu polítiku partidu CNRT nian iha Sabaraka-Laran Aileu Villa, domingu ne’e.
Tuir Xanana katak só liuhosi polítika dezentralizasaun mak bele hadia povu nia moris iha baze.
Lider másimu Partidu CNRT observa katak durante VIII Governu nia ukun, ekonómia nasaun ladún dezenvolve ho di’ak no povu ekonomikamente ladún sente dezenvolvimentu ekonómiku iha Timor-Leste.
Tanba ne’e, CNRT kompromete, kuandu ka’er ukun, sei foku hodi hadia vida nasaun nian liuhosi implementasaun polítika dezentralizasaun atu dezenvolvimentu ekonómia nasaun, povu bele hetan benefísiu.
“Aileu sei iha nia Governu no iha parlamentu rasik, hodi kontrola povu Aileu nia-moris hodi hodi hadia povu nia moris iha baze”, Xanana hateten.
Nia afirma, polítika dezentralizasaun adminitrativa ne’e sei fó vantajen di’ak ba povu tomak liuliu Aileu oan no munisípiu sira seluk.
Nia subliña, Aileu ne’ebé riku ho produtu órtikultura hanesan sabraka hosi Postu Administrativu Lequidoe, maibé komunidade ladún promove hodi faan iha merkadu nasionál.
Tanba ne’e, kuandu CNRT manán mak sei tau prioridade dahuluk ba polítika dezentralizasaun no poder lokál atu bele dezenvolve produtu sira.
Atu konkretiza planu prioridade ida ne’e, Kay Rala Xaanan Gusmão dezafia, povu Aileu tomak atu fó konfiansa absoluta ba CNRT ho númeru sorteiu 12, iha eleisaun loron 21 2023.
“Husu Aileu oan sira atu fó votu konfiansa totál ba CNRT no ha’u mak asume kargu Primeiru Ministru no sei implementa ida ne’e”, nia enkoraja.
Iha fatin hanesan, kordenadór CNRT Munisípiu Aileu, Rogeiro Araújo sei esforsu hodi fó vitória ba CNRT iha Munisípiu Aileu iha eleisaun parlamentár tinan ne’e hodi bele hadia buat balun ne’ebé lao naksalak iha munisípiu Aileu rasik.
Jornalista: Natalino Costa
Editór : Zezito Silva
