AILEU, 08 maiu 2023 (TATOLI) – Vise Ministru Interiór António Armindo, hateten fulan ne’e, Governu sei reforma 158 membru Polísia Nasionál Timor-Leste (PNTL).
“Loron ida ne’e Governu halo anúnsiu iha Jornál Repúblika ba sira ne’ebé maka reforma ho lista 158 mak sei reforma no sira ne’e sei reforma iha 30 fulan maiu tinan ne’e”, Vise Ministru Interiór António Armindo informa.
Deklarasaun ne’e hato’o hosi António Armindo perante kampaña ho tipu komísiu ne’ebé hala’o iha iha kampu football Sabarak-Laran Aileu Vila, segunda ne’e.
Nia dehan, iha segunda (8/5), Governu públika ona iha Jornál Repúblika, lista membru PNTL ne’ebé mak atu pasa ona ba idade reforma.
Governante ne’e dehan, hahú iha 30 maiu tinan ne’e, membru PNTL sira ne’ebé naran tama ona lista reforma sei la halo tán funsaunn hanesan membru PNTL.
António Armindo hateten, Polítika VIII Governu atu halo reforma ba membru PNTL sira ne’e atu fó fatin ba membru PNTL ne’ebé sei joven hodi hahú kaderniza joven sira atu bele lidera institusaun PNTL.
“Ha’u hanoin Governu hahú inisia prosesu ida ne’e atu dezenvolve institusaun PNTL, tanba ne’e sé mak ba kontinua governa, bele hadia de’it. Sé ita Partidu KHUNTO mak kontinua envolve nafatin, Governu sei mantein halo di’ak liután”, governante ne’e konklui.
Jornalista: Natalino Costa
Editór : Zezito Silva
