iklan

NASIONÁL, INTERNASIONÁL, EDUKASAUN, HEADLINE

AUPP atribui Doutoramentu Honoris Causa ba Xanana tanba servisu ba umanidade

AUPP atribui Doutoramentu Honoris Causa ba Xanana tanba servisu ba umanidade

Portavós no Koordenadór Polítika Esterna Partidu CNRT, Roberto Soares. Imajen TATOLI/Egas Cristóvão

DILI, 08 maiu 2023 (TATOLI) – Universidade América iha Phnon Penh (AUPP), Kamboja, atribui títulu Doutoramento Honoris Causa ba Kay Rala Xanana Gusmão tanba konsidera nia servisu durante ne’e liga tebes ba umanidade ne’ebé kontempla iha valór fraternidade umana.

Portavós no Koordenadór Polítika Esterna Partidu Kongresu Nasionál Rekonstrusaun Timor-Leste (CNRT, sigla portugés), Roberto Soares, haktuir katak vizita Prezidente partidu, Kay Rala Xanana Gusmão, bá Camboja ne’e tanba hetan konvite espesiál.

“Atribuisaun ida ne’e úniku no espesiál tebes ba ita-nia rain. Hanesan timoroan ita tenke orgullu tanba atribuisaun refere hetan no fó de’it rekoñesimentu figura iha ita-nia rain maka maun boot Kay Rala Xanana Gusmão ne’ebé sai nu’udar líder ezemplár iha papél fundamentál atu kontribui hodi kontinua kria pás, estabilidade no esforsu atu hasai povu hosi ki’ak no mukit. Tanba ne’e, maun boot Xanana hetan konvite ida ne’e hodi bá simu atribuisaun ne’e”, Roberto Soares dehan iha konferénsia imprensa ne’ebé hala’o iha Bairro dos Grilhos, segunda ne’e

Kay Rala Xanana Gusmão. Foto Facebook/Xanana ba Ema Hotu

AUPP konsidera Xanana Gusmão hanesan figura sentrál no importante ne’ebé bele kontribui ba prosperidade, la’ós de’it iha Timor Leste, maibé iha rejiaun Sudeste Aziátiku, inklui mós iha mundu. “Tanba ninia lideransa komprova ona liuhosi dedikasaun tomak durante prosesu lidera luta ba ukun rasik-aan to’o ohin loron mós sei nafatin fó ninia kontribuisaun hodi halo servisu ba nasaun doben”.

Portavós ne’e informa mós katak durante vizita Xanana nian, entre loron 03 no 07 maiu iha Camboja, halo mós enkontru importante ho Sekretáriu-Jerál ba ASEAN, Primeiru-Ministru Camboja, Hun Sem, ho governante sira seluk nomós akadémiku sira ne’ebé importante tebes iha ámbitu ba formasaun  iha arte no kultura.

“Enkontru ho Sekretáriu-Jerál ba ASEAN ne’e sira foku ba Timor-Leste ninia relasaun espesiál ho ASEAN, nomós Timor-Leste nia preparasaun atu sai membru. Iha Governu da-IV, V no VI iha governasaun Partidu CNRT nian ho esforsu tebes ba Timor-Leste nia adezaun ba organizasaun. Tanba ne’e, Governu Camboja rekoñese lideransa maun Xanana nian iha ámbitu atu lori Timor-Leste integra ba ASEAN”, nia refere.

Aléinde ne’e, portavós ne’e esplika katak Xanana Gusmão partisipa mós Sea Games ne’ebé mak hala’o iha nasaun refere. Durante iha Camboja Xanana hetan tratamentu espesiál tanba konsidera nia hanesan figura mundiál.

“Hosi oportunidade ne’ebé maun boot hetan, nia mós partilla Timor-Leste ninia esperiénsia iha ámbitu promosaun ba g7+, liuhosi promove diálogu ba pás no rekonsiliasaun atu país pós-konflitu sira bele transforma sai nasaun ne’ebé dezenvolvidu iha ekonomia, edukasaun, atubele kontribui ba povu nia moris di’ak hodi bele lori naran di’ak país pós-konflitu”, nia afirma.

Nia salienta vizita Xanana bá Camboja ne’e hetan apresiasaun hosi líder país ASEAN no akadémiku sira no oferese aviaun espesiál ida hodi tula hikas delegasaun hamutuk na’in-haat mai Timor-Leste.

Jornalista: Tomé Amado

Editora: Maria Auxiliadora

iklan
iklan

Leave a Reply

iklan
error: Content is protected !!