CNE identifika partidu kiik balun la kumpre oráriu kampaña eleitorál
COVALIMA, 08 maiu 2023 (TATOLI)–Diretór Komisaun Nasionál Eleisaun (CNE-sigla portugés) Covalima, Hermengildo de Sena, hateten Komisaun Nasionál Eleisaun (CNE-sigla portugés) identifika partidu kiik balun la kumpre oráriu kampaña eleitorál.
“Partidu boot sira hala’o kampaña la’o ho hakmatek, maibé partidu kiik sira mak halo CNE obserbadór nasionál no mídia sira konfuzaun, tanba partidu kiik halo aproximasaun ho CNE liuhosi telefónika. Realidade ita ba sira-nia fatin ne’ebé sira deside, maibé to’o iha fatin, sira la marka prezesna,” Hermengildo de Sena hateten ba Agência Tatoli, iha nia kna’ar fatin, Kampung Baru, segunda ne’e.
Maske partidu polítika sira la kumpre oráriu maibé CNE nafatin halo komunikasaun fali ho partidu polítiku sira kiik ida-rua foin husu diskulpa, nune’e sira hodi deside la realiza atividade kampaña eleitorál.
Aleinde kumpre tempu, partidu polítiku sira hala’o kampaña ho tipu sira hanesan mini kampaña, diálogu no kampaña komísiu aberta ne’e menór (labarik) sira barak mós mak partisipa.
Ho nune’e, CNE husu ba líder partdu polítiku sira hahú hosi partídu polítiku númeru sorteiu 1 to’o 17 atu halo koopersaun ho CNE ho di’ak.
Tuir oráriu, partidu polítiku sira hahú hala’o kampaña iha loron 19 fulan-abríl ne’ebé sei ramata iha loron 18 fulan-maiu tinan 2023.
Jornalista : Celestina Teles
Editór : Cancio Ximenes
