MANATUTO, 08 maiu 2023 (TATOLI)—Diretór Servisu Edukasaun Munisípiu Manatuto, Graciano de Jesus Baptista, preokupa ho estrada dirasaun postu administrativu Laclubar no Soibada tanba tempu udan estudante sira labele asesu ba eskola.
“Iha estudante balun ne’ebé asesu ba estrada difisil tebes liuliu iha Laclubar nian, eskola ida naran Manucocorian no ida tan iha Fatumakerek Lama nian ne’e, tempu udan araska. Tanba bainhira ita atu ba vizita tenke liuhosi Turiscai nian mak bele tama. Ida-ne’e, ita presiza dalan duni maibé parte MOP mak bele solusiona kestaun ne’e,” Diretór ne’ehateten ba Agência Tatoli, iha nia kna’ar fatin, foin lalais ne’e.
Nia hateten, Governu liuhosi Ministériu Obras Públika (MOP) se bele hanoin mós planu ba dalan ne’ebé estudante asesu ba eskola ne’e no presiza loke dalan, nune’e estudante no komunidade mós bele asesu.
“Tempu udan hanesan ne’e, ita labele ba vizita no mós estudante sira mós difisil atu ba eskola,” nia hateten.
Aleinde ne’e, atu halo komunikasaun ho funsionáriu ka profesór sira iha eskola ne’ebá de’it susar loos tanba laiha lina internet.
“Aleinde ne’e, ita mós difikuldade ba halo komunikasaun ho sira tanba laiha lina ne’ebé ajuda ita. Difisil tebes área ne’ebá ne’e. Tanba ita hakarak pasa informasaun ba sira mak ita tenke hakerek liuhosi WhatsApp hafoin buka signal nune’e sira bele asesu, se lae susar tebes ba ita,” nia dehan.
Nia dehan, la’ós ida-ne’e de’it i, maibé iha postu administrative Soibada mós dalan ladi’ak, inklui Barique Camedan nian.
“Até ita vila laran de’it iha eskola balun la asesu ba dalan hanesan eskola ida iha aldeia Rembor nian. Bainhira udan, estudnate sira labele asesu tanba iha tempu udan ne’e mota tuun ema la’o-ain sira labele hakur liu. Tanba, iha aldeia Rembor ne’e mota rua mak hadulas,” nia dehan.
Jornalista : Osória Marques
Editór : Cancio Ximenes
