DILI, 08 maiu 2023 (TATOLI)—Ministériu Agrikultura no Peska (MAP) iha tempu badak sei halo normalizasaun ba irrigasaun liga bá natar Dargata iha suku Bahatata, postu administrativu Uatucarbau, munisípiu Viqueque.
“Ita atende tarde irrigasaun liga bá natar Bahatata tanba iha Uatucarbau rasik iha natar barak, entaun iha tempu udan mota tun halo estraga barak, entaun bainhira ita atu atende hotu iha tempu hanesan ne’e susar, maibé iha ne’ebá ita tau mákina ida permenente atu atende, fiar katak iha tempu badak sei normaliza,” Diretór Nasionál Irrigasaun MAP, Martinho Laurentino Soares, relata ba Agência Tatoli iha ninia knaar fatin, MAP, Comoro, segunda ne’e.
Informasaun ne’e hato’o relasiona ho preokupasaun abitante hosi suku Bahatata kona-ba irrigasaun a’at maibé seidauk iha intervensaun ruma hosi autoridade kompetente sira, nune’e agrikultór sira labele halai natar.
“Atendimentu MAP ba normalizasaun irrigasaun ne’e dala-ruma tarde tanba Diresaun Nasionál Irrigasaun hasoru difikuldade tanba kombustível no mákina. Ita laiha orsamentu própriu ba kestaun ne’e, entaun pedidu sira hosi komunidade mai barak maibé ita atende tarde oitoan. Orsamentu ba tinan ida-ne’e ós ba irrigasaun seidauk aloka. Ita uza fali osan sira hosi kada diresaun sira la ezekuta hotu iha tinan ne’e hodi hola kombustível hodi hadi’a irrigasaun,” nia akresenta.
Notísia relevante : Abitante Bahatata Viqueque husu MAP normaliza irrigasaun liga bá natar Daragata
MAP iha mákina boot lima hodi atende iha munisípiu sira la inklui Rejiaun Administrativa Espesiál Oé-cusse Ambeno (RAEOA) no Ataúro.
“Iha tempu udan ita destaka hotu kedas ba munisípiu sira hodi atende komunidade nia preokupasaun, ne’ebé husu ba komunidade tarde ka sedu sei hadi’a, tanba ne’e tenke pasiénsia oitoan,” nia dehan.
Dirijente ne’e konta tuir, Ministru Agrikultura no Peska, Pedro dos Reis, iha tinan kotuk haruka kada diresaun sira-ne’ebé la ezekuta hotu orsamentu bele haruka hotu ba Diresaun Nasionál Irrigasaun, nune’e konsege halibur besik $100.000.
“Osan sira ne’e mak ita uza to’o agora hodi atende pedidu sira hosi ita-nia komunidade,” nia tenik.
Bazeia dadus hosi MAP, irrigasaun iha territóriu Timor tomak hamutuk 400 resin, ne’ebé hosi númeru ne’e, foin mak hadi’a balun de’it tanba kestaun orsamentu.
Jornalista : Arminda Fonseca
Editora : Julia Chatarina
