AILEU, 08 maiu 2023 (TATOLI) – Prezidente Partidu Klibur Haburas Unidade Nasionál Timor Oan (KHUNTO), Armanda Berta dos Santos, konsidera Timor-Leste agora daudaun depende de’it ba setór petrolíferu maibé la iha reseita seluk, tanba ne’e, KHUNTO kuandu envolve fila fali Governu mak sei aposta ba dezenvolvimentu turizmu.
Nia dehan, Timor-Leste poténsia ba fatin turizmu, hanesan iha Munisípiu Aileu, hanesan fatin istóriku barak, hanesan turizmu kulturál, KHUNTO mak povu fó fiar sei dezenvolve di’ak atu iha reseita ba Estadu.
“Kuandu KHUNTO nafatin hetan oportunidade iha Parlamentu no lidera Governu mak sei halao di’ak liután no konkretiza promesa hirak ne’ebé hato’o ona”, Armanda Berta dos Santos, dehan iha komísiu polítiku partidu KHUNTO ne’ebé mak halao iha kampu football Sabarak-Laran Aileu Vila, segunda ne’e.
Lider másima KHUNTO husu ba povu Aileu atu konkretiza mehi sira ne’e, tanba ne’e husu povu atu fó votu konfiansa ba KHUNTO.
Iha fatin hanesan, Konselleiru másimu, partidu KHUNTO, José dos Santos Naimori Bucar, kompromete kunaudu KHUNTO ka’er ukun, sei hadia estrada sira iha Munisípiu Aileu ne’ebé agora sei aat, hanesan Remexio to’o Ai-Cruz atu povu lori nia produtu ba nasionál.
Jornalista: Natalino Costa
Editór : Zezito Silva
