DILI, 08 maiu 2023 (TATOLI)—Vise Prezidente Komisaun A trata asuntu Justisa no Konstitusional, Deputada Domingas dos Santos, hateten Parlamentu Nasionál atu halo reformula fila-fali ba veta inkonstituisionalidade hosi Prezidente Repúblika ba projeitu-lei Rádiu Difuzaun ida ne’e depende ba tempu.
Notísia Relevante: PR veta inkonstitusionalidade ba dekretu PN lei Rádiu Difuzaun
“Ha’u seidauk simu informasaun kona-ba veto Prezidente nian ba projetu-lei ne’e maibé hanoin atu haree diskute fila-fali ba veta Prezidente nian ba lei ne’e, depende ba tempu tanba agora iha tinan polítiku kampaña eleitorál no besik eleisaun ona,” Vise Prezidente Komisaun A ne’e hateten ba Agência Tatoli iha uma fukum Parlamentu Nasionál, segunda ne’e.
Tambá ne’e, nia hatutan, atu haree fila-fali depende tempu ka karik bele iha lejislatura foun mai mak bele kontinua haree.
Kona-ba matéria ne’ebé sai razaun ba Prezidente Repúblika, José Ramos Horta, veta inkonstituisionalidade ba dekretu PN lei Rádiu Difuzaun, nia dehan, mai fali PN atu haree ida ne’e depende ba diskusaun no nia parte seidauk adianta.
Entretantu Prezidente Repúblika, José Ramos Horta, veta inkonstituisionalidade ba dekretu Parlamentu Nasionál (PN), Nú. 80/V, 07 marsu 2023, lei Rádiu Difuzaun.
Mensajen Prezidente Repúblika ba Parlamentu Nasionál no povu Timor-Leste katak komunika ba PN kona-ba nia veto por inkonstituisionalidade dekretu Nú. 80/V, 07 marsu 2023, lei Rádiu Difuzaun.
“Dekretu PN ne’e, ha’u-nia pedidu, objetu fiskalizasaun preventiva nia konstituisionalidade hosi Tribunál Rekursu, deklara inkonstituisionál liuhosi akordaun proferidu 27 abríl 2023, rejistu NUC Nú. 0055/23.TRDIL,” nia dehan.
Horta hato’o mensajen veto por inkonstituisionalidade, nia-parte deklara iha konformidade ho previstu iha alínea c) no e) iha artigu 85, no númeru 1 artigu 88 no númeru 1, 2, 3 artigu 149 konstituisaun repúblika.
Ho okaziaun ne’e, PR dirije ho dever konxiénsia Xefe Estadu, ezije partilla ho forma públika no transparante ho deklarasaun judisiál inkonstituisionalidade akordaun kontein ho razaun nune’e fundamenta PR nia-parte veto dekretu PN ne’e.
TR nia desizaun konsidera inkonstituisionalidade dispozisaun proposta lei permite atividade rádio difuzaun doutrinária utiliza espektro rádiufrekuénsia, ofende direitu konstituisionalmente protejidu, inklui liberdade igualdade no liberdade espresaun, Tribunál Rekursu mós konsidera proivisaun operadór rádiu no televizaun espasu emisaun ba propaganda polítika igualmente inkonstituisionaá ofende direitu liberdade espresaun.
Nota refere pedidu fiskalizasaun preventiva konstituisionalidade ba Tribunál, la kontesta konstituisionalidade direitu antena.
Ho razaun ne’e, Xefe Estadu expresa veto por inkonstituisionalidade dekretu PN no solisita reformulasaun diploma ne’e, konformidade ho akordaun pronúnsia inkonstituisionalidade dispozisaun no kumprimentu Nú. 1 artigu 88 Nú. º 3 artigu 149 konstituisaun.
PR nia mensajen termina ho apelu ba Deputadu Parlamentu Nasionál, enkuantu lejisladór, respeita parametru konstituisionalidade estabelese hosi konstituisaun repúblika.
Jornalista : Nelson de Sousa
Editór : Cancio Ximenes
