LIQUIÇA, 08 maiu 2023 (TATOLI)– Prezidente Partidu CNRT (Congreso Nacional Reconstrução de Timor), José Alexandre Kayrala Xanana Gusmão hateten atu hadia povu nia moris tenke fó fiar ba partidu CNRT atu manán absoluta iha Eleisaun Parlamentar (ElPar) 2023.
“Tenkesér mutlak ka maioria absoluta, tanba bainhira iha Parlamentu Nasional forte la presiza deskute tun sae lei, ita hakarak manán mutlak, hodi servi povu ida ne’e,” Xanana Gusmão deklara iha Kampaña Eleitoral ne’ebe realiza iha Munisípiu Liquiça, segunda ne’e.
Xanana hatete, CNRT mai ho komprimisiu ba parte tolu importante mak ferik katuas sira, ema ho defisiente inklui veteranus sira ne’ebé to’o agora seidauk hetan rekoñesimentu ba sira nia luta.
Prezidente Partidu CNRT ne’e husu simpatizante sira atu fo votus ba CNRT hodi bele manán mutlak tanba lakoi repete tan hanesan iha pasadu halo koligasaun maibe ikus mai tenke naksobu.
“Karik ita la manaan maioria ita tenke buka malu fali tan hanesan iha esperensia tinan 2018. Ita mai tenke servisu, CNRT lakoi ba kaer ukun hodi sai Ministru deit maibe ho prinsipiu hodi servi rai ne’e no povu ida ne’e,” nia deklara.
CNRT mos hakarak lori dezentralizasaun nune’e povu bele partisipa tanba laiha povu sei la vale buat ida, nune’e bainhira CNRT ukun iha kada munisípiu sei hili no deside rasik saida mak sira hakarak desenvolve iha sira nia rai.
Parte seluk, Kordenador CNRT Liquiça, Domingos dos Santos afirma ba simpatizante sira atu vota ba CNRT hodi lori Xanana Gusmão lidera governu dasia nune’e bele realiza povu sira nia mehi ba moris diak.
“Ita vota ba CNRT hodi lori Xanana ba kaer ukun dala ida tan no lori kargu Primeiru Ministru,” Domingos dos Santos afirma.
Kampaña Eleitoral husi Partidu CNRT ne’e rasik hahu iha tuku 03:00 lorokraik no hetan seguransa husi PNTL inklui misaun observasaun hanesan CNE, RENETIL, PDHJ no seluk tan.
Jornalista : Cidalia Fátima
Editora : Armandina Moniz
