DILI, 08 maiu 2023 (TATOLI)–Koordenadór Gabinete Polítika no Jestaun Fundu Petrolíferu hosi Ministériu Finansa, Cosme da Costa Araujo, hateten Ministériu Finansa bainhira atu halo levantamentu fundu mina-rai iha Banku Sentrál Timor-Leste (BCTL, sigla portuges) depende ba ezekusaun Orsamentu Jerál Estadu (OJE) hosi liña ministeriál sira.
“Prosesu ne’e baibain liña ministériu sira submete pedidu mai Ministériu Finansa hanesan Texouru hodi tau hamutuk depois halo pedidu ba banku sentrál no banku haruka pedidu ba banku iha Governu Federál iha Amérika hodi hasai fali osan. Hafoin Texouru foti tiha osan maka sira haruka karta ida mai ami katak sira foti ona hosi fundu mina-rai,” Koordenadór hateten iha salaun Ministériu Finansa, Aitarak-laran, segunda ne’e.
Notísia relevante : Governu halo poupansa biliaun $1,5 hosi levantamentu Fundu Minarai
Nia dehan, levantamentu fundu mina-rai ne’e ba kada trimestre ida halo dala-rua ka dala-tolu, depende iha nesesidade. Aleinde ne’e mós ezekusaun la’o di’ak iha trimestre ida bele foti to’o dala-rua, iha trimestre dahuluk 2023 ne’e foti dala-ida, ne’ebé balansu sei iha konta banku sentrál.
“Kuandu balansu osan iha banku menus ona entaun tenke hato’o pedidu para halo levantamentu ba banku Federál. Maibé tuir regra katak osan iha konta tezouru ne’e labele menus millaun $200, kuandu menus husu ba banku sentrál fa’an fali osan hosi fundu para lori aumenta,” nia esklarese.
Iha trimestre dahuluk Governu liuhosi Ministériu Finansa halo levantamentu iha trimestre dahuluk tinan 2023 hamutuk millaun $300.
Jornalista : Antónia Gusmão
Editora : Julia Chatarina
