DILI, 08 maiu 2023 (TATOL) – Ministériu Saúde fó tomada posse ba diretór 19, neen husi Institutu Nasionál Saúde Timor-Leste no tolu foun husi Minisériu Saúde, atu sira bele servisu ho reponsabilidade.
“Ohin Ministériu Saúde realiza serimónia, ida ne’e importante tebes hodi kompleta prosesu kriasaun Institutu Nasionál Saúde Públika Timor-Leste ka INSP-TL no mós prosesu re-estruturasaun servisu sentrál bazeia ba orgánika foun Ministériu Saúde nian tanba ne’e servisu tenke ho responsabilidade”, Ministra Saúde Odete Maria Freitas Belo dehan iha nia diskursu iha ámbitu serimónia posse ba diretór sira iha Salaun MS Caicoli, ohin.
Nia esplika, ho estrutura foun loke dalan atu hadia di’ak liután kna’ar Ministériu Saúde nu’udar responsável ba governasaun sistema nasionál saúde.
“Ho INSP-TL Guvernu kria instituisaun ida de’it ne’ebé bele armoniza área servisu ne’ebé to’o agora ita fahe entre servisu balun hanesan formasaun kontinua iha área prestasaun saúde, prevensaun no kontrolu moras, no mós ita bele minimiza duplikasaun área kompeténsia, ho objetivu ida maka atu hasa’e servisu Ministériu Saúde nian”, nia informa.
Emposadu sira husi Instituto Nasionál Saúde Publika Timor Leste (INSP-TL) mak Domingas da Costa Pereira hanesan Diretora Jerál ba Administrasaun.
Frederico Bosco Alves do Santos Diretór Jerál Tékniku Siéntifiku, Endang Soares da Silva Diretora Jerál ba Laboratóriu Saúde, Ivone de Jesus dos santos Diretora Nasionál Administrasaun Jerál, Livia Natalia Maria Guterres Babo Diretora Nasionál Rekursu Umanu, Jacinto Oliveira Guterres Diretór Nasionál Planu no Finansas, Martinho Joaquin Silveira Diretór Nasionál Aprovisionamentu,
Perpetua Ana Merry Estela Laut Diretora Nasionál Formasaun, Filipe Neri Machado Diretór Nasionál Saúde Publika, Marcelo Amaral Mali Diretór Nasionál Pesquiza no Dezenvolvimentu, Ari Jayanti Pereira Tilman Diretora Nasionál Patolojia Klínika no Mikrobiolojia,
Josefina Clarinha João Diretora Nasionál Toxikolojia Analize Agua no Ambiente, Domingas Campos Diretora Nasionál Kontrolu Kualidade no Apoiu ba Laboratóriu Servisu Nasionál Saúde, Marck Antonio Augusto Magno Neves Diretór Unidade Etika no Peskiza Dezenvolvimentu, Ivo Ireneu Conseição Freitas Diretór Unidade Jestaun Parseria, no Helder Mendonça de Carvalho Diretór Unidade Garantia Kualidade.
Aleinde ne’e, iha mós diretór foun na’in tolu husi Ministériu Saúde mak Vitór Soares hanesan Diretór Jerál Unidade Jestaun Projetu, Natalia Araujo Diretora Nasionál Nutrisaun no Noel Gama Diretór Nasionál Apoiu Prestasaun Kuidadu Saúde Primáriu no Familiár.
Jornalista : Felicidade Ximenes
Editór : Zezito Silva