PR Horta hakarak Governu foun mai hakle’an unidade
DILI, 08 maiu 2023 (TATOLI)—Prezidente Repúblika (PR), José Ramos Horta, nia espetativa no hakarak IV Governu Konstitusionál foun mai ne’ebé forma hosi partidu vensedór hosi eleisaun parlamentár ne’e, atu hakle’an unidade bele governa di’ak liután rai ida-ne’e.
“Primeiru ita hein sé mak atu kaer ukun, se iha karik maiória absoluta ka lae, sei haree lai. Mezmu partidu ida iha maiória absoluta, ha’u-nia akonsellamentu bolu partidu seluk tan, nune’e haree hetan konsensu nasionál, estratéjia ida hamutuk ba oin, atu rai ne’e bele hakle’an liután estabilidade no hakle’an unidade, nune’e bele governa di’ak liután,’’ PR Horta hateten ba jornalista sira iha Embaixada Malázia iha Avenida Portugál, Dili, segunda ne’e.
Nia hatutan, tanba tinan lima mai ne’e tenke desizaun barak halo, maibé se laiha maiória absoluta tenke halo koligasaun ruma.
“Ha’u sei hateten koligasaun saida mak ha’u simu no ha’u la simu. Purtantu, ha’u sei haree kada partidu ida-idak nia hahalok tinan sira-nia laran. Ha’u sei haree ho Prokuradór Jerál Repúblika, Tribunál Rekursu ho CAC, relatóriu situasaun kada partidu nian, depois ha’u sei hateten tanba Prezidente Repúblika tenke defende makaas Estadu Direitu Demokrátiku,” nia hateten.
Prezidente Repúblika labele hanesan taka matan tiha ba partidu ruma ne’ebé iha problema oioin tinan sira-nia laran.
“Purtantu, ha’u la temi naran maibé ha’u hanoin hotu-hotu hatene,” nia dehan.
Jornalista : Nelson de Sousa
Editór : Cancio Ximenes
