PR Horta hametin relasaun ho Malázia lori investimentu mai TL
DILI, 08 maiu 2023 (TATOLI)—Prezidente Repúblika (PR), José Ramos Horta, hametin relasaun ho Malázia hodi loei investimentu mai Timor-Leste (TL).
Xefe Estadu ne’e hateten, primeiraz vés ASEAN mai Timor-Leste ne’e mak Malázia no nia parte iha relasaun metin ho atuál Primeiru Ministru Malázia nian, nune’e nia espera ho sira buka aumenta relasaun ho Malázia.
‘’Embaixadór Malázia foin hatete ba ha’u, agora ema Malázia bara-barak mai semana-semana ema investedór mai buka, haree estuda situasaun atu halo investimentu iha Timor. Ha’u espera katak iha futuru investimentu boot Malázia bele mai iha Timor,’’ PR Horta hateten ba jornalista sira bainhira partisipa iha komemorasaun loron Idul Fitri ne’ebé selebra hosi Embaixada Malázia iha Avenida Portugál, Dili, segunda ne’e.
PR dehan, eventu ne’e hanesan baibain nasaun ho nia Embaixada sira sempre simu sira nia komunidade tomak ne’ebé hela iha nasaun sira ne’ebé sira reprezenta hodi halibur malu hametin sira nia kontatu, amizade ho sira nia komunidade rasik.
“Eventu idul fitri, ha’u sempre nunka falta. Foin daudaun ba iha Embaixada Indonézia, Malázia sira foin mak selebra idul fitri tanba sidadaun Malazianu lubuk ida ba li’ur foin mak fila,” nia dehan.
Jornalista : Nelson de Sousa
Editór : Cancio Ximenes
