Progresu konstrusaun edifísiu CNE Covalima atinje ona 74%
COVALIMA, 08 maiu 2023 (TATOLI)–Diretór Komisaun Nasionál Eleisaun (CNE-sigla portugés) Covalima, Hermengildo de Sena, hateten progresu konstrusaun edifísiu Komisaun Nasionál Eleisaun (CNE, sigla portugés) Covalima ne’ebé lokaliza iha aldeia Tabakolot, suku Debos, postu administrativu Suai, munisípiu Covalima atinje ona 74%.
“Ita hatene, progresu konstrusaun edifísiu CNE Covalima lokaliza iha área Tabakolot foin atinje 74%. Progresu konstrusaun tarde ho razaun katak kompañia kontratór kaer obra rua, nune’e tarde fornese materiál konstrusaun hodi afeta ba progresu konstrusaun edifísiu CNE iha Covalima,” Hermengildo de Sena hateten ba Agência Tatoli iha nia kna’ar fatin, Kampung Baru, segunda ne’e.
Progresu konstrusaun atinji ona 74% tanba konstrusaun edifísiu oras ne’e daudaun traballadór sira taka ona zinku, pinta, monta plafon no agora daudaun trabaldór sira foru hela edifísiu CNE no seluk tan.
Tuir loloos, nia dehan, progresu konstrusaun atinje ona 90% ona tanba de’it kompañia fornese materiál hosi dili mai munisípiu tarde, no razaun seluk mós tanba iklima agora iha munisípiu Covalima udan halo traballadór labele servisu bainhira ahi mate.
Prosesu konstrusaun edifísiu CNE Covalima depende ba eletrisidade, tanba bainhira ahi mate mak trabaldór sira labele hala’o servisu.
Bazeia ba kontratu kompañia ho UNDP sei finaliza iha loron 31 fulan-maiu tinan 2023 ne’e, maibé konstrusaun foin atinje 74%.
Edifísiu CNE ne’e, konstrui hosi kontratór kompañia Via Mali hodi kontrata badaen 14 hodi halo servisu atu konstrui edifísiu CNE Covalima.
Edifídiu CNE konstrui hosi kompaña Via Mali Unipesoál, Lda, ho durasaun tempu durante fulan neen (6) no kompañia hahú konstrui iha loron 26 fulan-novembru tinan 2022 ho orsamentu $150,009.72 .
Jornalista : Celestina Teles
Editór : Cancio Ximenes
