DILI, 08 maiu 2023 (TATOLI)—Reprezentante povu iha uma fukum Parlamentu Nasionál (PN), liuhosi Deputadu bankada CNRT, Domingos Carvalho, husu ba Institutu Jestaun Ekipamentu no Apoiu Dezenvolvimentu, Institutu Públiku (IGEADE, I.P) atu normaliza estrada liga ba sentru votasaun iha eleisaun parlamentár 2023.
“Ha’u atu foti de’it preokupasaun estrada fatin importante hanesan iha Aileu suku rua karreta sei labele tama, tanba ne’e husu tékniku sira hosi Ministériu Asuntu Parlamentár no Komunikasaun Sosiál (MAPKOMS) iha ne’e, atu tau lista hela hodi hato’o tutan ba ba IGEADE, I.P óinsa loke netik dalan la to’o kilometru ida hodi fasilita transporta materiál sensitivu eleisaun nian inklui movimentu komunidade nian. Tanba, iha ne’eba laiha dalan atu asesu ba fatin votasaun, só bele de’it ho motor mak loiu dalan ne’e,’’ Deputadu CNRT ne’e levanta liuhosi reuniaun plenária PN, segunda ne’e.
Nia mós hato’o kondisaun dalan iha Bobonaro, hosi suku Daihutu, postu Cailaco no fatin ida tan estrada kotu, ida-ne’e difikuldade atu lori materiál eleisaun ba fatin votasaun ne’e la di’ak, nune’e presiza normaliza fali dalan nune’e karreta bele tama.
“Husu oinsá hadi’a dalan ne’e atu iha eleisaun 21 maiu mai ne’e, bele fasilita lori urna no fasilita movimentu ita-nia komunidade nian,” nia hateten.
Deputada PLP, Regina Freitas, sekunda ho preokupasaun ne’e husu atu Governu hadi’a ka normaliza estrada liu-liu fatin liga ba sentru votasaun sira, nune’e labele lori materiál sensitivu eleisaun nian ho motor, maibé presiza transporta ho karreta maibé kondisaun dalan iha difikuldade entaun presiza iha intervensaun rápida.
Iha reuniaun plenária ne’e, Deputada FRETILIN, Lídia Norberta, mós levanta kona-ba nia-parte simu pedidu hosi komunidade postu Fatumea hato’o lamentasaun iha suku tolu de’it lokaliza iha fronteira ho problema estrada aat, tanba iha ne’eba área izoladu hodi redús atividade ilegál, problema rede telekomunikasaun, harii eskola paralelu iha hodi fasilita estudante sira asesu besik, tanba dadaun distánsia dook no reforsa profisionál saúde iha postu.
Deputadu FRETILIN, José Paicheco, hato’o estrada iha Aileu parte Seloi ba Gleno ne’e movimentu transporte di’ak tebes, tanba merkadu ida iha Seloi ne’e negosiante sira hosi área rua mai maibé kondisaun estrada mak difikulta sira.
Entretantu, iha reuniaun plenária ne’e la marka presenza hosi parte reprezentante Governu no iha de’it tékniku sira hodi anota preokupasaun sira hosu deputadu sira.
Jornalista : Nelson de Sousa
Editór : Cancio Ximenes
