Ataúru, 08 maiu, 2023 (TATOLI)- Sekretariadu Tékniku Administrasaun Eleitorál (STAE) realiza formasaun loron ne’en ( hahú husi 3 maiu to’o 9 maiu ) ba ofísial hamutuk 215 iha munisípiu Ataúru hodi prepara ba eleisaun parlamentár tinan ne’e.
Diretór STAE munisípiu Ataúru, Aliapa Da Costa hatene objetivu husi formasaun ne’e, atu fahe informasaun hodi hasa’e koñesimentu ofísiais eleitorál sira nian , kona-ba sira-nia papél durante períodu eleisaun.
“Ita fahe informasaun adekuadu kona-ba papél prinsipál husi parte ofísial eleitór sira ne’ebé hola parte iha eleisaun parlamentár ne’e. Matéria ne’ebé fahe mak hanesan Fiskais sira-nia devér hodi bele prenxe akta, no halo observasaun ho rigór iha prosesu kontajen de votu,” Diretór STAE munisípiu Ataúru, Aliapa Da Costa informa ba jornalista TATOLI, iha suku vila maun meta, segunda ne’e.
Dirijente ne’e haktuir além de ne’e, STAE fahe mós informasaun kona-ba papél importante husi jornalista ne’ebé halo kobertura no inklui ho papél membru polísia ne’ebé hola parte mós iha períodu importante ba festa demokrásia Ida nee.
Diretór ne’e, hatutan formasaun no matéria sira ne’e hotu, atu tulun ofísial eleitorál sira bele serbisu ho efetivu no efikásia, hodi asegura eleisaun parlamentár ne’e, hodi labele mosu intendementu ruma husi parte polítiku sira.
“Ita hakarak iha eleisaun parlamentár ne’e tenke hala’o no di’ak iha munisípiu Ataúru, maibé ida ne’e presiza tebes parte hotu-hotu tenke serbisu ho profisionalizmu atu bele hetan rezultadu pozitivu husi ita- nia atendementu,’’ Nia dehan.
Entretantu, tuir dadus, STAE – Ataúru rejista ofísial eleitorál hamutuk 200 no brigada 15, inklui membru PNTL balun.
Jornalista: José Belarmino De Sá
Editora: Nelia Borges
