ERMERA, 08 maiu 2023 (TATOLI) – Sekretariadu Tékniku Administrasaun Eleitórál (STAE) munisípiu Ermera rejista ona eleitór sira hamutuk 85, 853 kompotu husi feto 41,358 no mane 44,495 ne’ebé mak sei partisipa iha Eleisaun Parlamentar 21 maiu.
Diretór STAE Munisípiu Ermera, Eduardo Casimiro de Deus informa katak husi populasaun Ermera 138,080 (Sensu 2022), 62% (85, 853) populasaun mak sei partisipa iha eleisaun.
Nia dehan, STAE munisípiu Ermera serbisu maka’as ho atividade sosializasaun hodi hasa’e koñesimentu no konsiénsia komunidade sira nian hodi partisipa iha Eleisaun Parlamentár.
“Brigada STAE sira halo ona edukasaun votante tama sai uma no ba to’o área remotas no aldeia sira. Ita mós halo Edukasaun Votante mobile iha merkadu sira hodi hasa’e taxa partisipasaun eleitores,” Eduardo ba Tatoli iha Suku Fatubolu, Postu Administrativu Hatulia B, Munisípiu Ermera, segunda ne’e.
Nia dehan, alénde STAE no CNE, líder komunitária sira mós serbisu maka’as tebes hodi hasa’e taxa partisipasaun eleittór sira nian iha Eleisaun Parlamentár mai ne’e.
“Lideransa komunitária sira mobiliza ona komunidade sira atu oinsá mak hasa’e taxa partispasaun eleitór iha munisípiu Ermera,” Eduardu akresenta.
Nia dehan, STAE Munisípiu Ermera preparadu no prontu realiza Eleisaun Parlamentár iha Postu ne’en – Railaco, Ermera, Letefoho, Atsabe, Hatulia A no Hatulia B.
Eduardu relata katak poling staff hamutuk 1580 husi munsípiu Ermera mak simu ona formasaun hodi asegura Eleisaun Parlamentár 21 maiu ho krédivel, justu no livre.
Jornalista: Filomeno Martins
Editora: Nelia Borges
