STAE Manufahi fó formasaun ba ofisiál eleitorál
MANUFAHI, 08 maiu 2023 (TATOLI) – Diretór Sekretariadu Tékniku Administrasaun Eleitorál (STAE) Munisípiu Manufahi Ângelo da Costa Corterial, informa STAE prepara ofisiál hirak ne’e atu servisu iha estasaun votu ida-idak iha Postu Adimistrativu Same no sira seluk iha Munisípiu Manufahi.
“STAE prepara atu sira bele halo servisu ho di’ak, ida ne’e mak ita presiza fó formasaun ba-sira, iha Munisípiu Manufahi ho totál 1360, formasaun agora iha Same-Vila hamutuk 710, maibé restu ne’e sei tuir de’it iha Postu Administrativu ida-idak hanesan Fatuberliu, Alas no Turiscai”, Diretór dehan ba jornalista sira iha edifísiu Administrasaun Munisípiu Manufahi, segunda ne’e.
Aleinde ne’e, iha abertura formasaun, nia husu ba ofisiál hotu atu foku ba materiá ne’ebé formadór sira hosi STAE fó atu bele hala’o servisu ho responsabilidade durante eleisaun.
“Iha formasaun tenke sériu, atu hala’o servisu ho responsabiliade, formasaun atu ita-boot sira iha koñesimentu ba ita-boot sira nia papel, tenke hatudu disiplina servisu, hatudu servisu di’ak ba eleitór sira, husu ita-boot sira foku ba formadór sira ne’ebé fó formasaun ba ita bo’ot sira”, nia husu.
Formasaun ba ofisiál hirak ne’e loke direta hosi Administradór Munisípiu Manufahi Arantes Isaac Sarmento no husu ba formandu sira atu sériu iha formasaun atu hala’o servisu ho responsabilidade maske servisu iha loron hira de’it maibé termina futuru Timor-Leste nian ba tinan lima.
“Ita-boot sira mak autór prinsipál ba eleisaun ida ne’e ho kualidade, garante katak eleisaun ne sei la’o ho di’ak, hamutuk ho brigadista sira, servisu ho responsabilidade, labele mai hanesan fali partidu polítiku ida ka grupu, hatudu ita-boot nia independente sai hanesan ema profisionál, eleva tan imi nia koñesimentu atu implementa iha servisu”, Arantes dehan.
Nia esplika, iha formasaun ne’e sei aprende kona-ba lei no krime eleitorál, tanba ne’e mak labele viola saida mak lei bandu.
“Ita-boot sira tenke sente na’in ba prosesu sira hotu liuhosi komportamentu ne’ebé iha, servisu karik ho sériu atu servisu hotu la’o ho di’ak, maske imi-nia servisu loron ida rua maibé nia valór boot tebes ba nasaun nian iha tempu naruk”, nia relata.
Totál ba sentru votasaun iha Manufahi hamutuk 115, estasaun votu 136 no totál eleitór iha Munisípiu Manufahi hamutuk rihun 42-resin.
Formasaun ne’e hala’o durante loron tolu, hahú ohin, 08 to’o 10 maiu.
Jornalista: Hortencio Sanchez
Editór : Zezito Silva
