STAE Manufahi identifika sentru votasaun 40 kondisaun estrada la di’ak
MANUFAHI, 08 maiu 2023 (TATOLI) – Diretór Sekretariadu Tekniku Administrasaun Eleitorál (STAE) Munisípiu Manufahi Ângelo da Costa Cortereal informa, identifika ona sentru votasaun hamutuk 40 mak kondisaun estrada la di’ak atu lori matriál eleisaun ba.
“Ami identifika ona kondisaun estrada ba sentru votasaun hamutuk 40 iha Manufahi ne’e la dun di’ak, sei fó risku bainhira ita transporta material eleisaun nian ba, maibé la hatene hare ba ita nia klima agora ne’e udan hela ne’e bele liu tan 40 tanba kondisaun estrada maioria mak udan estraga,” dehan Diretór ne’e ba Jornalista-sira iha edifisiu Administrasaun Munisípiu Manufahi, segunda ne’e.
Maske nune’e STAE Manufahi iha ona planu hodi buka meiu alternative hodi asegura material hirak ne’e bele to’o ba iha sentru votasaun sira.
“Ita iha ona planu hanesan tinan kotuk atu asegura ba matrial sira ne’e, bainhira kareta ba la di’ak mak ita tenke selu ema para lori ba to’o iha fatin votasaun sira, ita garante sei seguru no laiha fallansu, ida ne’e mak ita nia alternative atu nune’e bele garante povu hotu partisipa iha eleisaun,” nia dehan.
Total sentru votasaun iha Manufahi hamutuk 115, estasaun votu 136 no total eleitór iha Munisípiu Manufahi hamutuk rihun 42-resin.
Jornalista: Hortencio Sanchez
Editór : Zezito Silva
