STAE realiza formasaun ba ofisiál eleitorál postu Baucau Vila
BAUCAU, 08 maiu 2023 (TATOLI) – Sekretariadu Tékniku Administrasaun Eleitorál (STAE) munisípiu Baucau segunda ne’e, realiza formasaun kona-ba prosesu eleisaun ba ofisiál eleitorál hamutuk nain-530 hosi postu administrativu Baucau Vila.
Diretór STAE munisípiu Baucau, Natividade Freitas Guterres, esplika, formasaun refere realiza durante loron-rua ne’ebé loron dahuluk sei aprende teória no sei remata ho simulasaun ho objetivu atu intende kona-ba lala’ok prosesu eleisaun parlamentár.
“Komesa agora sira parte ona hosi STAE entaun tenke kaer metin prinsípiu katak asegura demokrasia, servisu ho imparsialidade, neutralidade no transparánsia,” Diretór STAE Baucau informa ba Agência TATOLI iha Sentru Konvensaun Baucau (CCB, sigla portugés), Vila Antiga, segunda ne’e.
Hosi totál númeru refere bazea ba estasaun votasaun ho totál 53 iha postu Baucau tanba kada estasaun votasaun presiza pesioál ofisiál eleitorál na’in-10.
Matéria importante iha formasaun komposta hosi prosesu votasaun, kna’ar pozisaun hanesan sekretária, identifikadór na’in-haat, ofisiál tinta na’in-ida, ofisiál liña na’in-rua no verifikadór na’in-haat no ofisiál buletin votu na’in-ida.
“Munisípiu Baucau aban sei finaliza hotu ona formasaun,” Natividade Guterres akresenta.
Loron efetivu ba ofisiál eleitorál sira durante loron-tolu bazeia ba kontratu katak hahú hosi distribusaun materiál sensitivu, loron eleisaun no distribusaun materiál sensitivu ba munisípiu.
STAE Baucau rejista sentru votasaun hamutuk sentru votasaun hamutuk 150 no estasaun votu hamutuk 180 hosi totál brigada na’in-150 no ofisiál eleitorál hamutuk 1.800 hosi totál eleitór 99.158.
Jornalista : Natalino Belo
Editór : Evaristo Soares Martins
