VIQUEQUE, 08 maiu 2023 (TATOLI)—Udan-boot akontese iha rejiaun ponta leste, iha domingu (07/08) maizumenus tuku 17:35 rezulta mota Uetuku lori abitante ida ho naran Afonso Gomes hosi aldeia Uatulesu, suku Uaimori, postu Viqueque Villa, munisípiu Viqueque, no ikus mai la konsege salva-an.
“Mota Uetuku lori abitante ida to’o iis kotu. Abitante ne’e hela iha Cararas no agora família sira evakua ona mate-isin ba nia-uma,” Adjuntu Protesaun Sivíl, Cirilio Soares Gomes, informa ba Agência Tatoli, iha postu Viqueque Villa, segunda ne’e.
Notísia relevante : Udan-boot rezulta mota kuaze sobu sala Eskola Tékniku Vokasionál Hera
Afonso Gomes ho idade 50 nu’udar agrikultór ida, iha lorokraik sai hosi to’os atu fila bá uma, nune’e bainhira fila la’o iha mota Uetoku nia klaran maka mota-boot tun hodi lori abitante ne’e.
Iha fatin ketak, Xefe suku Uaimori, Francelino António Gomes, haktuir, hafoin akontesimentu, abitante lokál sira bá fatin akontesimentu maibé bainhira to’o, Afonso Gomes hakotu ona iis.
“Bainhira sira tuir toman duni, maibé matebian iis laiha ona, ne’ebé família sira lori mate-isin kedas ba uma hodi halo prosesu fúnebre,” nia tenik.
Jornalista : Vitorino Lopes da Costa
Editora : Julia Chatarina
