Autoridade Covalima husu EDTL, E.P kontrola eltrisidade iha Eleisaun Parlamentár
COVALIMA, 09 maiu 2023 (TATOLI)–Reprezentante Administradór Munisípiu Covalima, Francisco de Jesus Alves, husu ba tékniku Eletrisidade Timor-Leste, Empreza Públiku (EDTL, E.P) atu kontrola enerjia eletrisidade labele mate durante iha eleisaun parlamentár.
“Ha’u hakarak husu servisu ne’ebé importante iha eleisaun parlamentar, hanesan institusain Eletrisidade Timor-Leste, Empreza Públiku (EDTL, E.P) atu kontrola eletrisidade bainhira materiál eleisaun distribui ona ba sentru votasaun, nune’e eletrisidade labele mate,” Francisco de Jesus Alves hato’o iha nia diskursu bainhira partisipa enkontru preparasaun ba eleisaun parlamentár iha salaun STAE Covalima, Kampung Baru, tersa ne’e.
Aleinde ne’e, nia mós husu ba administradór postu administrativu atu orienta ba xefe suku atu konstribui pás iha eleisaun parlamentár.
“Administradór postu administrativu sira orienta ba xefe suku ita hotu mantein pozisaun hodi kontribui másimu ba eleisaun parlamentár tanba eleisaun hanesan festa demokrásia hodi deside futuru nasaun ida-ne’e iha tinan lima, responsablidade la’ós lidér hotu atu kontribui pás no estabilidade,” nia dehan.
Koordenadór EDTL, E.P, Alaxandre Seran, klarifika Tékniku Eletrisidade Timor-Leste Empreza Públika (EDTL.EP) sei garante eletrisidade sei lakan normal iha eleisaun parlamentár 2023.
“Ha’u-nia tékniku sira preparadu ona no fahe ona sira-nia oráriu, nune’e tékniku fahe oráriu balun tama loron no balun tama kalan no ekipamentu mós sufisiénte atu halo atendimentu,” nia hateten.
Diskute asuntu transporta-lojístika-seguransa
Aleinde ne’e, autoridade munisípiu Covalima liuhosi Sekretáriu Tékniku Administrasaun Eleitorál (STAE) ho entidade hotu hala’o diskusaun asuntu transporte, lojístika no seguransa hodi prepara ba eleisaun parlamentar.
“Enkontru ohin loron organiza hosi Sekretáriu Tékniku Administrasaun Eleitorál (STAE), ne’ebé reponsabiliza prosesu eleisaun oinsá halo preparasaun ba eleisaun parlamentár. Ita ko’alia primeiru mak asuntu lojístika, transporte no seguransa importante ne’ebé komandante rasik esplika ona menus rekursu umanu maibé sira iha tátika rasik,” nia dehan.
Parte lojístika Administrasaun Munisípiu Covalima hamutuk ho STAE preparadu hodi haree ba transporte ni’an, tanba karreta lubuk ida mak apoiu hosi entidade hotu liu-liu administradór postu sira sei fó apoiu karreta kuaze 20-resin.
Ho nune’e, nia husu sidadaun hotu tenke mantein kalma hodi kontribui pás no estabilidade iha rai ida-ne’e, sidadaun sira tenke partisipa hodi ezerse sira-nia direitu votu iha loeon eleisaun 21 maiu, tanba sidadaun sira-nia votu determina distinu nasaun ba prosesu dezenvolvimentu durante tinan lima (5).
Diretór Sekretáriu Tékniku AdministrasaunEeleitorál Munisípiu Covalima, Francisco Gusmão reforsa, enkontru ohin ne’e parteida atu divulga informasaun kona-ba preparasaun ba eleisaun parlamentár.
“Enkontru, ohin divulga informasaun servisu STAE ba entidade relevante sira hodi halo preparasaun ba eleisaun parlamenáar,” nia dehan.
STAE divulga informasaun servisu ba entidade relavante sira hanesan, preparasaun STAE hahú hosi transporte, materiál husi nasionál mai iha munisípiu, hafoin halo verifikasaun buletin votu to’o halo distribuisaun ba materiál sensitivu ho non sentivu ba sentru votasaun sira.
Antes ne’e, iha 13 fevereiru 2023, Prezidente Repúblika José Manuel Ramos Horta, dekreta ona loron eleisaun parlamentár hodi hala’o eleisaun iha 21 maiu 2023.
Tuir oráriu ne’ebé Komisaun Nasionál Eleisaun (CNE-sigla portugés) aprova, partidu polítiku hala’o kampaña eleitorál hahú iha loron 19 fulan-abríl ne’ebé sei ramata iha loron 18 fulan-maiu tinan ne’e
Jornalista : Celestina Teles
Editór : Cancio Ximenes
