MANUFAHI, 09 maiu 2023 (TATOLI) – Administradór Munisípiu Manufahi Arantes Isaac Sarmento, husu ba Governu sentrál liuliu Ministériu Obras Públika (MOP) atu orienta ekipamentu pezadu balu direta ba Mota Laklo ne’ebé estraga komuniade uma-kain kuaze 115 nia uma no tos.
“Fatin ne’e kada tinan sempre akontese, autoriedade munisípiu hato’o ona ba Governu sentrál dala hira ona, meiu hotu ita halo atu iha tinan ida ne’e, antes udan mai ita halo ona barazen balu ba mota ne’e, maibé to’o ikus laiha resposta ikus mosu nune’e, entaun ita kontatu kedan ona ba Obras Públika nasionáal atu apoiu lalais”, Arantes ba jornalista-sira iha Alas, tersa ne’e.
Nia dehan, medida ne’ebé Governu munisípiu halo mak iha tinan kotuk hamutuk ho Governu sentrál halo ona barajen iha mota ninin maibé la konsege kobre hotu mak akontese nune’e.
“Maibé akontese tia nune’e, ohin ha’u rasik mak lidera ekipa ida liga ho liña ministeriál sira hosi munisípiu nian la’os atu mai observa maibé mai atu evakua ita-nia sidadaun sira sai hosi fatin risku no lori mós ho apoiu emerjénsia balu fó ba ita-nia komunidade sira”, Administradór dehan.
Haree ba kondisaun komunidade sira uma grave tebes, Arantes hateten primeiru tenke salva uluk komunidade sira hosi fatin risku, nune’e lori ba zona aman hafoin halo normalizasaun ba mota.
Iha biban ne’e, Komandante Autoriedade Protesaun Sivil (APC-sigla portugés) Inspetór Polísia Nivio Jerónimo Baprista, informa tuir dadus provizóriu ne’ebé sira hetan, komunidade ho totál uma-kain 115 maibé uma-kain 24 mak grave liu no evakua ona ba iha fatin seguru.
“Agora dadus ne’ebé ita foti hahú horseik ne’e provizóriu, uma-kain 24 mak kondisaun grave, ne’e mak ita lori ona ajudu emerjénsia nian mai ne’e, maibé ne’e dadus provizóriu, ita sei kontinua buka tuir tan”, Nivio hateten.
Nia hatutan, daudaun ne’e korente mota komesa makas tan de’it tanba udan ne’ebé mai la para, ho nune’e sira nia ekipa nafatin hein iha terenu atu evakua komunidade sira hosi fatin akontesimentu.
“Maibé ekipa ida ohin ne’e lidera hosi administradór ne’ebé parte hotu tun hotu, Saúde, Polísia Nasionál Timor-Leste (PNTL), Falintil Forsa Defeza Timor-Leste (F-FDTL), ami rasik no Agua no Saneamentu mós tun hotu atu ajuda apoiu ita-nia komunidade sira”, nia dehan.
Apoi ne’ebé parte APC iha mak hanesan hahan no materiál dapur no seluk tan.
“Agora daudaun apoiu hirak ne’e ita lori ona mai iha ne’e, hein fahe de’it ba ita-nia komuniade sira ne’ebé mak hetan dezastre”, nia esplika.
Notísia relevante : Mota Laklo afeta komunidade, husu Governu halo barrajen
Jornalista: Hortencio Sanchez
Editór : Zezito Silva
