DILI, 09 maiu 2023 (TATOLI)–Komisaun Nasionál Eleisaun (CNE, sigla portugés) hamutuk ho Banku Mundiál Timor-Leste realiza semináriu ida hodi fahe hanoin ba partidu polítiku sira kona-ba importánsia dezenvolvimentu iha Timor-Leste.
“Atu dehan katak asuntu dezenvolvimentu ne’e importante hola parte iha Eleisaun Parlamentár 2023. Governu Timor-Leste bele aproveita vizaun jerál no oportunidade lubuk ida, hanesan poténsia atu adere ba Asosiasaun Nasaun Sudeste Aziátiku (ASEAN, sigla inglés) no Organizasaun Mundiál Komérsiu (OMK), infraestrutura foun hanesan Portu Tibar, no projetu fibra ótika. Tanba ne’e, Governu ne’ebé sei mai iha responsabilidade boot atu aproveita oportunidade sira ne’e,” Reprezentante Banku Mundiál iha Timor-Leste, Bernard Harborne, hateten, iha salaun Laline Larigutu CNE, Colmera, tersa ne’e.
Notísia relevante : Governu Timor-Leste fahe polítika no intervensaun ba Banku Mundiál
Nia nota katak avansu boot ne’ebé durante ne’e Timor-Leste iha desde governasaun dahuluk to’o agora no atinjimentu iha asesu ba eletrisidade hosi 18% iha tinan 2000 sa’e ona ba 96% iha tinan ne’e, maski nafatin sei iha dezafiu.
“Banku mundiál mós nota katak dezafiu boot sei iha nafatin, ne’ebé husu ba Governu sé de’it mak atu mai, di’ak liu tau-atensaun ba dezenvolvimentu sira tuir mai,” nia fó hanoin.
Biban hanesan, Prezidente CNE, José Belo, hateten, Banku mundiál submete ona pergunta balun ba debate públiku ho partidu polítiku sira.
“Tanba ne’e sira sei fahe uluk hanoin ba partidu polítiku sira. Banku mundiál mós kontribui pergunta balun ba debate públiku ho partidu sira, pergunta sei hato’o maibé di’ak liu tempu oportunu konvida partidu polítiku katak situasaun ba oin ne’e la’ós de’it kestaun polítika maibé ekonomia ne’e sai ameasa boot ba timor-oan, tanba ne’e maka partidu sira ne’ebé daudaun kampaña hela projesaun sira ne’e ba oin, di’ak liu Banku Mundiál fahe mós informasaun ba sira atubele iha hanoin katak futuru sé mak atu ukun presiza tau prioridade iha dezenvolvimentu,” nia akresenta.
Prezidente CNE dehan, tuir péritu sira-nia hanoin katak iha tinan 2023 to’o 2024 ekonomia mundiál sei defísil, tanba ne’e maka Timor-Leste mós tenke preukupa.
“Sé de’it mak manán, maski ita iha fundu mina-rai maibé tenke utiliza didi’ak, gastu tenke iha retorunu, tenke iha efisiénsia no efikásia,” nia tenik.
Jornalista : Antónia Gusmão
Editora : Julia Chatarina
