DILI, 09 maiu 2023 (TATOLI)—Deputada hosi bankada FRETILIN iha Parlamentu Nasionál (PN), Helena Martins, husu komisaun Nasionál Eleisaun (CNE, siglá portugés) atu fó atensaun ba lider partidu polítiku (Parpol) sira-ne’ebé ko’alia liafuan kro’at ka insulta malu iha períodu kampaña eleitorál.
“Tuir mai mós lidér atu tun ba kampaña ita tenke kumpre lei eleitorál, CNE presiza fó xamanda atensaun ruma id aba hirak ne’ebé insulta ema,” Deputada Helena hato’o liuhosi intervensaun iha plenária PN, tersa ne’e.
Nia hatente, tanba ba povu hotu atu rona didi’ak mak programa partidu polítika nian hodi hadi’a no hametin dezenvolvimentu ba Timor-Leste, ne’ebé rai ne’e ema sosa ho ruin no ran hatudu lia loos.
Deputadu PLP, Noe Ximenes, husu atu timoroan hotu ka’er unidade nasionál tun iha baze atu aprezenta de’it programa ba militante no apoiante sira, no dignifika lidér funu na’in ka rezisténsia sira ho loloos.
Deputadu KHUNTO, Luis Roberto, hateten eventu demokrátiku ne’ebé daudaun la’o no iha 19 abríl tinan ne’e, hahú hosi ne’eba to’o daudaun iha periódu kampaña eleitorál, nia parte nota lideransa no kuadru polítika hosi partidu balun hasai linguajen insulta malu hodi hatudu liman ba malu.
Nune’e, tuir nia, presiza kontrola linguazen tanba linguajen ne’e mak halo atu sai lideransa ho étika nune’e povu bele fó konfiansa
Nia hateten, tinan 20-resin Timor-Leste restaura ona indepedénsia no dezenvolvimentu nasaun ne’e la’o ba oin presiza unidade nasionál no hotu-hotu nia kontribuisaun atu lao ba oin.
Deputadu CNRT, Domingos Carvalho, hateten iha faze kampaña líder sira ba iha fatin sira ko’alia hatun malu, hanesan daudaun iha kampaña iha buat balun faktu ne’ebé ko’alia loos no iha buat balun ko’alia ho tensaun no aas, bele ko’alia buat sira-ne’e maibé labele insulta malu.
Jornalista : Nelson de Sousa
Editór : Cancio Ximenes
