ERMERA, 09 maiu 2023 (TATOLI) – Prezidente Partidu Nasionál Rekonstrusaun Timor-Leste (CNRT, sigla portugés), Kay Rala Xanana Gusmão hato’o iha kampaña eleitorál Munisipiu Ermera, kapitál Gleno katak bainhira povu fó fiar kaer IX Governu, sei implementa desentralizasaun poder ho estabelesimentu Asembleia Munisipál Ermera hodi rezolve povu Ermera nia problema.
Líder Partidu ne’e dehan, implementasaun poder lokál ho kriasaun Asembleia Munisipál Ermera ne’e bazeia Planu Estratéjiku Dezenvolvimentu 2011-2030.
“Objetivu prinsipál husi Asembleia Munisipál Ermera ne’e atu lori governu besik liu ba povu Ermera,” Xanana Gusmão hateten ba Militante no Simpatizante Partidu CNRT iha Gleno, ohin.
Líder Karizmátiku ne’e dehan, bainhira Asembleia Munisipál Ermera estabelese ona mak deputadu munisipál sira sei ko’alia no diskute kona-ba problema Ermera nian.
“Desentralizasaun ne’e ita babain ko’alia dehan hakbesik governu ba povu, katak halo governu lokál ida iha Ermera ne’e,” Líder Karizmatiku ne’e hato’o iha ninia intervensaun durante kampaña partidu CNRT iha Munisípiu Ermera, Kapitál Gleno, tersa ne’e.
Nia dehan, ho implementasaun polítika desentralizasaun ne’e, Ermera-oan duni mak sei kaer Governu lokál.
Xanana subliña mós katak implementasaun desentralizasaun poder lokál ne’e sei lori hikas matenek-na’in Ermera oan sira husi Dili mai dezenvolve sira-nia rai.
“Sira sei mai forma governu lokál ida iha ne’e. Sei iha Asembleia ka Parlamentu Munisipál Ermera kompostu husi Railako, Hatulia, Atsabe, Ermera no Letefoho. Entaun sei iha deputadu parlamentu munisipál sira,” Xanana esplika.
Xanana subliña asembleia munisipál ninia knaar mak sei bolu governu lokál hodi tau-atensaun ba problema munisípiu Ermera nian atu garante ema hotu sente independénsia.
Líder nasionál ne’e hateten, implementasaun dezentralizasaun poder lokál sei lori mós vantajen ba dezenvolvimentu ekonomia munisípiu sira.
“Ita haree iha dalan sira ne’e fa’an sasan hotu mai husi li’ur. Ita sa’e mai, ita haree tanzeriña no sabraka barak. No, ita ba sosa fali bebida lata jus maibé ita mós iha ai-fuan. Entaun osan ne’ebé mak ita simu ba hotu rai liur,” Xanana hateten.
Tanba ne’e mak, tui Prezidente Partidu CNRT, dezenvolvimentu ekonomia ne’e atu fasilita saida mak povu prodúz, osan tenke fila ba povu para moris.
Jornalista: Filomeno Martins
Editora: Nelia Borges
