DILI, 09 maiu 2023 (TATOLI) – Governu Alemaun liuhusi Servisu Alemaña Interkámbiu Akadémiku ka iha lian inglés hanaran German Academic Exchange Service (DAAD) – Helmut-Schmidt scholarship, oferese Bolsa Estudu ba estudante internasionál sira husi nasaun ne’ebe iha dezenvolvimentu nia laran, inklui Timor-Leste atu halo kursu mestradu iha Alemaña. Bolsa estudu refere, globalmente, kuñesidu ho naran Bolsa Estudu Mestradu ba Polítika Públika no Boa Governasaun.
Objetivu husi programa refere, tuir komunikadu DAAD ba Tatoli, ohin, mak atu fasilita estudante husi nasaun ne’ebé iha dezenvolvimentu nia laran hodi promove boa governasaun, demokrasia, no justisa sosiál iha sira-nia rain.
“Ho prinsípiu boa governasaun, kandidatu kualifikadu sira bele konkorre ba bolsa refere hodi kontinua sira-nia kursu mestradu iha área direitu, ekonomia, siénsia sosiál no polítika no administrasaun,” refere komunikadu ne’e.
Programa bolsa estudu DAAD – Helmut-Schmidt loke ba estudante internasional husi nasaun hamutuk 150, ne’ebe mai husi kontinente Ázia, Áfrika, Amerika Latina no Oriente Médio atu estuda iha universidade ho kualidade di’ak iha Alemaña. Bolsa estudo sei kobre propinas eskola, tratamentu mediku, fó insentivu ba transporte no insentivu kada fulan durante estuda iha universidade ho durasaun kursu mínimu tinan rua (2).
Atual bolseira programa Bolsa estudu DAAD – Helmut-Schmidt, Josefina Pereira sente kontente tanba bele reprezenta Timor-Leste tinan ida ne’e hodi halo ninia kursu mestradu iha Dezenvolvimentu no Governasaun iha Universidade iha Alemaña hamutuk ho estudante husi nasaun seluk hanesan Brazíl, Mexico, Nikaragua, India, Venezuela, Egipto, Pakistan, Uganda, Zimbabwe, Sri Lanka, Vietnam, Indonezia, Mongolia, Ghana, Tunisia, no seluk tan.
“Programa bolsa estudu DAAD – Helmut-Schmidt la’os de’it suporta ha’u iha parte akadémiku, maibé fó mos oportunidade mai ha’u hodi estuda no analiza perspetiva globál konabá dezenvolvimentu sosiál, polítika, no ekonomia. Ha’u agredese DAAD ba oportunidade furak ida ne’e no ha’u enkoraja aspirante akadémiku no futuru lideransa sira atu aplika ba bolsu ida ne’e hodi mellora sira nia kuñesimentu iha área ne’ebé sira hakarak espesializa ba,” Josefina Pereira hateten.
Kritéria atu konkorre ba bolsa estudu DAAD – Helmut-Schmidt mak:
- Tenke ramata kursu lisensiatura iha área relevante;
- Iha esperiénsia servisu relevante ho mínimu tinan rua (2);
- Abilidade di’ak iha lian Inglés no kompleta mos rekezitu sira tuir espetasaun programa refere;
Konkorre ba programa DAAD – Helmut-Schmidt tinan 2024 hahú loke ona ba públiku no sei taka iha fulan 31 jullu 2023.
Kandidatu sira ne’ebé mak interrese, Iha komunikadu DAAD ne’e esplika, bele konkorre online liuhusi DAAD nia portál https://scholarshipscorner.website/daad-helmut-schmidt-programme/. hodi submete sira-nia konkursu, inklui formuláriu konkursu, CV/rezume, karta rekomendasaun, karta motivasaun ka deklarasaun propózitu aliña ho sira-nia kualifikasaun akadémiku no karreira profesionál.
Komunikadu ne’e mós fó sai katak atu bele hatene kona-ba programa bolsa estudu DAAD – Helmut-Schmidt no prosesu oinsá atu konkorre, rejista ba webinar online ne’ebe sei realiza aban, kuarta-Feira, 10 maiu, tuku 04:30 to’o 05:30 lorokarik.
Tatoli
