iklan

HEADLINE, SAÚDE

ML-TL sosializa moras lepra ba estudante 05 maio de Becora 

ML-TL sosializa moras lepra ba estudante 05 maio de Becora 

Misaun Lepra TL halo sosializasaun moras lepra ba estudante 05 de Maio Becora. Imajen Tatoli/Felicidade Ximenes

DILI, 09 maiu 2023 (TATOLI) – Misaun Lepra Timor-Leste (ML-TL) liuhosi programa hakbiit ema afeta moras lepra halo sosializasaun ba estudante sira husi Eskola Sekundariu 05 de maio kona-ba sinais sintomas moras lepra.

“Ami halo atividade ida-ne’e ba estudante sira oinsá sira bele koñese kona-ba moras lepra no halo detetivu sedu no prevensaun ba transmisaun moras lepra ne’ebé iha”, Koordenador Projetu Hakbiit Ema Afeta Moras Lepra, Sebastião de Sousa Freitas, dehan ba jornalista sira iha eskola sekundáriu 05 de maio Becora, ohin.

Nia informa, atividade advokasia ba triajen no apoiu alimentár ba ema afeta moras lepra sira no mós fó kapasitasaun ba asosiasaun lepra ne’ebé agora eziste iha TL.

“Ami halo atividade ne’e iha suku ba suku no husi eskola sira maibé ami halao ba ema ne’ebé iha konsiensia rasik hakarak rona halo triajen no escrining ami bolu sira mai hanorin oinsá bele prevene moras lepra no oinsá atu deteta moras ida ne’e nia kauza husi saida iha sira nia família uma-laran, entaun kazu moras lepra ne’ebé ita rejista iha 2022 hamutuk 118, iha teritóriu nasionál no iha 2023, janeiru to’o marsu ita rejista nai’in ualu, entaun ami kontinua nafatin halo advokasia ba estudante sira atu hatene kona-ba moras ida ne’e”, nia afirma.

Nia esplika, moras lepra afeta ba ema husi idade 17 mai kraik maibé kazu makas liu afeta ba ema ho idade vulneravél sira tanba ne’e Misaun Lepra Timor-Leste (ML-TL) servisu hamutuk ho Ministériu Saúde no Organizasaun Mundial Saúde hodi apoiu aimoruk lepra.

“Ami servisu ho MS durante ne’e bainhira ami deteta ami haruka ba fasilidade saúde ne’ebé mak besik hodi halo tratamentu saúde”, nia relata.

Iha fatin hanesan, Diretór Eskola Sekundáriu Jerál 05 de Maio, Adelino Nicolau Hornai, hateten liuhosi sosializasaun ida ne’e ba estudante sira sai hanesan fonte informasaun hodi halo prevensaun ba moras lepra hodi elemina moras ida ne’e iha Timor-Leste.

“Misaun lepra ne’ebé mai hodi fó formasaun ba ami-nia estudante sira, ida ne’e hola parte importante ida ba estudante sira, tanba estudante sira mós sai hanesan fonte informasaun ba inan aman no kolega sira no sosiedade tomak, presiza atu halo prevensaun liuhosi sosializasaun hodi hamenus lepra iha ita-nia rain”, Adelino Nicolau Hornai afirma.

Estudante Sekundáriu husi 05 de maio Becora partisipa sosilisiazaun no advokasia hamutuk 100.

Jornalista : Felicidade Ximenes

Editór : Zezito Silva

iklan
iklan

Leave a Reply

iklan
error: Content is protected !!