AILEU, 09 maiu 2023 (TATOLI) – Prezidente Komisaun Polítika Nasionál hosi Partidu Demokrátiku (PD), Adriano Nacimento, hateten partidu kompromete katak kuandu kaer ukun mak sei tau prioridade ba diálogu no konsensu nasionál hodi lider nasionál tur hamutuk hodi rezolve problema nasaun nian.
“PD mak manan, sei tau prioridade ba diálogu no konsensu nasionál hodi lider nasionál tur hamutuk hodi rezolve problema nasaun nian”, Adriano Nacimento hateten iha komísiu polítiku Partidu PD ne’ebé akontese iha kampu football Sabaraka-Laran Aileu Vila, tersa ne’e.
Tuir nia, nasaun ida ne’e labele monu iha instabilidade polítika, labele monu ba frazilidade, se lae ema nia-konfiansa ba nasaun ne’e laiha ona.
“Ita hakarak promeve unidade nasionál, promove fraternidade umana, ita nudar timoroan, labele haketak malu, atu nune’e bele kuda konfiansa rai seluk nian katak Timor-Leste iha dignidade nudar nasaun”, Prezidente CPN PD ne’e hateten.
Iha biban ne’e, Adriano Nascimento kompropmete kuandu PD manan eleisaun sei hametin fali relasaun institusionál Prezidénsia ho Parlamentu Nasionál, Governu no Tribunál.
“Ema nain haat ne’e tenke servisu hamutuk tanba orgaun soberania Timor-Leste iha ai-rin haat, sira nain haat tenke metin, se la mentin ita-nia vida iha perigu, tanba ne’e PD mai ho pilár haat ida mak atu hametin relasaun institusionál”, nia dehan.
Nia mós promote, PD manan karik sei hametin institusaun Estadu sira iha Timor-Leste liuhosi promove governasaun di’ak liuliu kombate korrupsaun, koluzaun no nepotizmu iha Timor-Leste, nune’e nasaun ne’e bele la’o di’ak, rekursu Estadu bele to’o iha povu nia liman.
Jornalista: Natalino Costa
Editór : Zezito Silva
