iklan

Uncategorized

PM Taur to’o ona iha Labuan-Bajo hodi partisipa simeira ASEAN

PM Taur to’o ona iha Labuan-Bajo hodi partisipa simeira ASEAN

Primeiru-Ministru Taur Matan Ruak ho delegasaun to'o ona iha Labuan-Bajo, Provínsia Nusa Tengarah Indonézia (NTT)-Indonézia. Média/PM

DILI, 09 maiu 2023 (TATOLI)— Primeiru-Ministru, Taur Matan Ruak ho delegasaun to’o ona iha Labuan-Bajo, Provínsia Nusa Tengarah Timur (NTT)-Indonézia ho aviaun marka Bandeira Timor-Leste (Aero Dili), iha ámbitu atu partisipa iha Simeira ASEAN ba dala-42 ne’ebé sei realiza hosi loron 09 to’o 11 fulan-maiu, tinan 2023, ne’ebé sei lidera hosi Indonézia.

“Primeiru-Ministru (PM) Taur Matan Ruak ho delegasaun to’o ona iha Labuan Bajo, Provínsia NTT-Indonézia ho Aviaun marka Bandeira Timor-Leste (Aero Dili)”, refere nota ne’ebé Agência TATOLI asesu, tersa ne’e.

imajen/ Media PM

PM Taur ho delegasaun hetan konvite ofisiál hosi Prezidénsia ASEAN, Indonézia, hodi reprezenta Estadu no Governu Timor-Leste iha Simeira ASEAN nian ba dahuluk nu’udar membru Paízes ba dala 11 ho estatutu observador, hafoin hetan admisaun ho unanimidade hosi Paízes membru 10 ASEAN iha fulan-novembru, tinan 2022 liuhosi Simeira ba dala-41 iha Phnom Penh, ne’ebé Prezidénsia hosi Reinu Kamboja.

Iha marjen Simeira ASEAN nian ne’e, Xefe Governu mós sei hola oportunidade hodi hala’o enkontru ho Xefe Estadu no Xefe Governu hosi paízes membru ASEAN nian, hodi buka hametin relasaun no kooperasaun tantu bilateral no multilateral iha Rejiaun ASEAN nian.

Xefe Governu ho delegasaun sei to’o fali rai-laran iha loron 11 fulan-maiu, tinan 2023.

Xefe Estadu no Xefe Governu ho delegasaun ne’ebé sei partisipa iha simeira ASEAN ba dala-42, ho totál kuaze ema 700-resin ne’ebé mai  nasaun Indonézia hanesan uma-na’in, delegasaun Timor-Leste, Brunei Darussalam, Kambodia, Laos, Malázia, Filipina, Singapura ho Vietname.Oráriu ba Simeira ASEAN bá dala-42 mak iha loron 8 maiu ho ajenda mak enkontru entre korpu diplomátiku sira ASEAN), loron 9 maiu mak iha enkontru Ministru Negósiu Estranjeiru ASEAN nian no iha loron 10 no 11 maiu, mak iha seremónia espesiál hanesan Simeira ASEAN bá dala- 42.

Jornalista:  Hortencio Sanchez

Editór         : Florencio Miranda Ximenes

iklan
iklan

Leave a Reply

iklan
error: Content is protected !!