PNTL Manufahi seidauk rejistu krime eleitorál durante kampaña ParPol
MANUFAHI, 08 maiu 2023 (TATOLI) – Komandante Polísia Nasionál Timor-Leste (PNTL) Munisípiu Manufahi Joni Viana das Regras, informa kampaña Partidu Polítiku (ParPol) iha Manufahi besik remata ona maibé komandu seidauk rejistu kazu krime eleitorál ruma.
“Kampaña partidu boot sira remata ona, hela de’it partidu kiik balu maibé Manufahi seidauk rejistu kazu krime eleitorál, ne’e hatudu katak povu Manufahi maduru ona no kria estabilidade iha sira rain rasik”, Komandante dehan iha Salaun Administrasaun Munisípiu Manufahi, segunda ne’e.
Nia dehan, Manufahi hatudu espiritu dame makas tebes no sai ezemplu ba munisípiu seluk atu banati tuir.
“Manufahi sai ezemplár ba munisípiu seluk, maibé ita-nia tempu sei barak, mantein nafatin buat ne’ebé iha hodi ba oin atu hatudu ita ne’e maduru ona, ita hakribi ona violénsia, ita hakarak mak pás no estabilidade”, nia dehan.
Nia apela ba komunidade hotu atu mantein liu pás iha eleisaun 21 maiu mai ne’e, maske fanátiku iha partidu saida de’it, kria pás no estabilidade mak importante.
PNTL Munisípiu Manufahi prontu atu ezekuta orden oras 24 haat hodi fó seguransa másimu ba povu no nasaun liuliu iha eleisaun ne’ebé sei akontese 21 maiu.
Jornalista: Hortencio Sanchez
Editór : Zezito Silva
