DILI, 08 maiu 2023 (TATOLI) – Diretór Nasionál Ambulánsia Emerjénsia no Medikamentu (SNAEM.IP) Horacio Sarmento, informa hosi janeiru to’o marsu, ró ambulánsia evakua ona pasiente hamutuk 26 husi Munisípiu Ataúro mai Hospitál Nasionál Guido Valadares (HNGV) hodi hetan tratamentu husi profisionál saúde.
“Durante fulan tolu ne’e ró ambulánsia evakua ona pasiente husi Ataúro mai Dili hamutuk 26 husi ne’e maioria labarik sira ne’ebé afeta moras dengue, diarea, Infensaun Vias Respiratóriu Aguda (ISPA) inklui inan isin rua sira ne’ebé mak ho kazu komplikasaun sira”, Horacio Sarmento hateten iha nia kna’ar fatin Caicoli, ohin.
Nia dehan, ró ambulánsia durante ne’e evakua pasiente sira husi Munisípiu Ataúro de’it no RAEOA halo evakuasaun ho aviaun ambulánsia.
‘’Ró ne’e loloos halo evakusaun ba pasiente husi OE-CUSSE hotu maibé dook, entaun ita uza aviaun ambulánsia no ró ne’e ita tula pasiente sira husi Ataúro de’it”, nia afirma.
Nia esplika, ró ambulánsia ne’e SNAEM.IP halo manutensaun rugular no kondisaun ró di’ak, se bainhira iha kazu emerjénsia ruma iha Munisípiu Ataúro mak foin ba evakua mai naisonál.
“Ita-nia ró nia kondisaun di’ak hela tanba ita halo manutensaun, entaun bainhira kazu emerjénsia ruma iha Ataúro ita ba evakua kedas mai HNGV”, nia relata.
Ró ambulánsia ne’e oferese husi Governu Indonézia ba Ministériu Saúde ho kapasidade tula pasiente hamutuk 25 ho velosidade ne’ebé mak lais liu atu fasilita no evakua pasiente sira husi Munisípiu Ataúro mai HNGV.
Ró ambulánsia ne’e sosa ho $ 200.000 husi PT. Fiberboat Indonézia no mai to’o Timor Leste husi Surabaya Java Leste.
Jornalista : Felicidade Ximenes
Editór : Zezito Silva
