AINARO, 09 Maiu 2023 (TATOLI) – Sentru Saúde Ainaro Vila rejista, entre janeiru no abril, pasiente besik 3.000 ne’ebé sofre Infesaun Respiratória Aguda (IRA).
“Hahú husi janeiru to’o abril tinan ne’e, ami rejista moras ne’ebé dominante mak Infesaun Vias Respiratória aguda husi suku hitu ne’ebé pertense ba postu administrativu Ainaro Vila. Kada fulan, ita rejista pasiente besik 800, husi númeru ne’e kompostu husi ema bo’ot no labarik sira. Ne’e signifika husi períodu ne’e, ami rejista moras ISPA ne’e besik 3.000”, Xefe Sentru Saúde Ainaro Vila, Arquimenio Orleans de Araújo, informa ba Tatoli, iha Postu Saúde Ainaro Vila, tersa ne’e.
Tuir dirijente, moras ISPA kauza husi vírus, tanba mudansa klimátika, ambiente lamoos, ahi suar, rai rahun no konsumu bee ne’ebé la moos.
Arquimenio de Araújo haktuir sentru saúde refere rejista mós pasiente ne’ebé sofre pneumonia. Moras ne’e provoka dada iis ladi’ak bainhira lahalo tratamentu ho lalais.
Sentru Saúde Ainaro Vila rejista mós moras naun kontajioza sira hanesan ipertensaun no diarreia, maioria afeta liu ba labarik sira.
“Diarreia ne’e impaktu husi amebinte ne’ebé la saudável no ipertensaun ne’e moras króniku ,tanba han hahan arbiru, konsumu hahan ne’ebé mina barak, hemu alkóliku barak no fuma sigaru”, nia esplika.
Dirijente ne’e informa, moras seluk ne’ebé sentru saúde ne’e rejista mak moras kulit ne’ebé kauza husi mikróbiu, tanba ambiente ne’ebé la di’ak, konsumu bee merak no haris bee ne’ebé la moos.
“Intervensaun ami nian mak liuhusi ami nia atendimentu pesoál médiku ne’ebé kolokadu iha sentru saúde sira iha kada suku no ami mós fahe informasaun kona-ba prevensaun ba moras hirak ne’e”, nia realsa.
Kona-ba stock aimoruk dirijente ne’e dehan sira sempre halo proposta regular hodi garante disponibilidade aimoruk iha sentru saúde sira hodi halo tratamentu ba pasiente.
Jornalista: Afonso do Rosário
Editora: Isaura Lemos de Deus
